കൊച്ചി • സി.പി.എം നേതാക്കളായ മുൻ മന്ത്രിമാർക്കെതിരേയും മുൻ സ്പീക്കർക്കെതിരേയും വെളിപ്പെടുത്തലുകളുമായി സ്വപ്ന സുരേഷ്. കടകംപള്ളി സുരേന്ദ്രൻ കൊച്ചിയിൽ ഹോട്ടൽ മുറിയിലേക്ക് ക്ഷണിച്ചുവെന്നും പി. ശ്രീരാമകൃഷ്ണൻ ഔദ്യോഗിക വസതിയിലേക്ക് ഒറ്റയ്ക്ക് വരാൻ ആവശ്യപ്പെട്ടുവെന്നും തോമസ് ഐസക് മൂന്നാറിലേക്ക് കൊണ്ടുപോകാമെന്ന് പറഞ്ഞുവെന്നും സ്വപ്ന ഒരു സ്വകാര്യ ടെലിവിഷൻ ചാനലിന് നൽകിയ അഭിമുഖത്തിൽ വെളിപ്പെടുത്തി.
ഒരു എം.എൽ.എയോ മന്ത്രിയോ ആയിരിക്കാൻ യോഗ്യതയില്ലാത്ത വ്യക്തിയാണ് കടകംപള്ളി സുരേന്ദ്രനെന്ന് സ്വപ്ന തുറന്നടിച്ചു. ഫോണിൽ കൂടി മോശമായി സംസാരിക്കുകയും ലൈംഗികച്ചുവയോടെ പെരുമാറുകയും ചെയ്തിട്ടുണ്ട്. ഇക്കാര്യങ്ങൾ ശിവശങ്കറിന് അറിയാമായിരുന്നുവെന്നും സ്വപ്‌ന പറഞ്ഞു. മന്ത്രിയല്ലേ ആരോടും പറയേണ്ടെന്നാണ് ശിവശങ്കർ പറഞ്ഞത്. ഇതിനെല്ലാം തെളിവുണ്ട്. അത് ഇ.ഡിക്ക് കൈമാറിയിട്ടുമുണ്ട്.
മുൻ സ്പീക്കർ പി. ശ്രീരാമകൃഷ്ണൻ കോളേജ് വിദ്യാർഥിയെ പോലെയാണ് പെരുമാറിയിട്ടുള്ളത്. ഔദ്യോഗിക വസതിയിലെ മദ്യപാന സദസിനിടെ മോശമായി പെരുമാറി. ഒറ്റയ്ക്ക് ഔദ്യോഗിക വസതിയിലെത്താൻ ആവശ്യപ്പെട്ടുവെന്നും സ്വപ്ന പറഞ്ഞു.
സ്‌പേസ് പാർക്കിലെ തന്റെ നിയമനം കമ്മിഷൻ നേടിയെടുക്കുന്നതിന് വേണ്ടിയായിരുന്നു. മുഖ്യമന്ത്രി പിണറായി വിജയൻ, മകൾ വീണ വിജയൻ, ശിവശങ്കർ എന്നിവർ ചേർന്ന് ചർച്ച നടത്തിയാണ് തന്നെ നിയമിച്ചതെന്നും സ്വപ്ന പറഞ്ഞു.