തിരുവനന്തപുരം: ഇതിങ്ങനെ പോയാല്‍ എവിടെ ചെന്നെത്തും. ഓരോ മലയാളിയും ഉറക്കേ ചോദിച്ചു തുടങ്ങിയിരിക്കുന്നു ഈ ചോദ്യം. കൊവിഡ് വാണം പോലെ കുതിച്ചുയരുമ്പോഴും ഭരണകൂടത്തിന്റെ പ്രഖ്യാപനങ്ങളല്ലാതെ നടപടികളൊന്നുമുണ്ടാകുന്നില്ല. ഉണ്ടാകുന്നവ ഫലപ്രദവുമല്ല. 

വീണ്ടും പ്രതിദിനവര്‍ധന 31,445 കടന്നിരിക്കുന്നു. അപ്പോഴും എല്ലാത്തിനെയും നേരിടാന്‍ സജ്ജമാണെന്നാണ് മുഖ്യമന്ത്രിയുടെ തള്ള്. മരണം പ്രതിദിനം 215 ആയി ഉയര്‍ന്നു. അപ്പോഴും പറയുന്നു നമ്മള്‍ മരണത്തെ പിടിച്ചുകെട്ടിയെന്ന്. അരിയാഹാരം കഴിക്കുന്നവരെ കൊഞ്ഞനം കുത്തലല്ലേ ഇത് എന്നാണ് ആരോഗ്യ രംഗത്തുള്ളവരുടെ തന്നെ ചോദ്യം. എറണാകുളം ജില്ലയില്‍ വീണ്ടും നാലായിരം കടന്നു രോഗികള്‍. വീണ്ടും ഒന്നാം സ്ഥാനത്താണ് കൊച്ചി. 4048 രോഗികള്‍, തൃശൂര്‍ 3865, കോഴിക്കോട് 3680, മലപ്പുറം 3502, പാലക്കാട് 2562, കൊല്ലം 2479, കോട്ടയം 2050 എന്നിങ്ങനേയാണ് ജില്ലകളില്‍ ഇന്ന് ഏറ്റവും കൂടുതല്‍ രോഗ ബാധ സ്ഥിരീകരിച്ചത്.

1,65,273 സാമ്പിളുകള്‍ പരിശോധിച്ചതിലൂടെ ടെസ്റ്റ് പോസിറ്റിവിറ്റി നിരക്ക് 19.03 ആയി ഉയര്‍ന്നു. 

 215 മരണങ്ങള്‍ ഇന്ന് മാത്രം സ്ഥിരീകരിച്ചതോടെ ആകെ മരണം 19,972 ആയി. ഇരുപതിനായിരത്തിന് തൊട്ടരികെ. അതും യഥാര്‍ഥ കണക്കല്ല എന്നതും ചേര്‍ത്തുവായിക്കണം. 

പ്രതിവാര ഇന്‍ഫെക്ഷന്‍ പോപ്പുലേഷന്‍ റേഷ്യോ അടിസ്ഥാനമാക്കി തദ്ദേശ പ്രദേശങ്ങളെ തരംതിരിച്ചിട്ടുണ്ട്. 74 തദ്ദേശസ്വയംഭരണ പ്രദേശങ്ങളിലായി 414 വാര്‍ഡുകളാണ് ഡബ്ല്യു.ഐ.പി.ആര്‍. എട്ടിന് മുകളിലുള്ളത്. ഇവിടെ കര്‍ശന നിയന്ത്രണമുണ്ടാകും.