കാബൂള്‍: താലിബാന്‍ സ്ഥാപക നേതാവ് മുല്ല ഉമറിന്റെ ഖബറിടം ജനങ്ങള്‍ക്ക് പ്രാര്‍ത്ഥന നടത്തുന്നതിനായി തുറന്നുകൊടുത്തു. ഖബര്‍ എവിടെയാണെന്ന കാര്യം ഒമ്പത് വര്‍ഷമായി താലിബാന്‍ രഹസ്യമാക്കിവച്ചിരിക്കുകയായിരുന്നു. അടുത്ത കുടുംബാംഗങ്ങള്‍ക്ക് മാത്രമേ ഈ സ്ഥലത്തെക്കുറിച്ച് അറിവുണ്ടായിരുന്നുള്ളൂ. പ്രാര്‍ത്ഥിക്കാന്‍ അനുമതിയും ഇവര്‍ക്ക് മാത്രമായിരുന്നു.

സാബുല്‍ പ്രവിശ്യയിലെ സൂരി ജില്ലയിലെ ഒമര്‍സോയ്ക്ക് സമീപമാണ് അന്ത്യവിശ്രമസ്ഥലം. ഞായറാഴ്ച ഉവിടെ നടന്ന ചടങ്ങില്‍ താലിബാന്റെ മുതിര്‍ന്ന നേതാക്കള്‍ സംബന്ധിച്ചതായി വക്താവ് സബീഹുല്ല മുജാഹിദ് വെളിപ്പെടുത്തി. രാജ്യത്തിനകത്തും പുറത്തും ശത്രുക്കള്‍ ഉള്ളതിനാലും രാജ്യം അധിനിവേശ ശക്തികള്‍ക്കു കീഴിലായതിനാലും ഖബറിന് കേടുപാടുകള്‍ സംഭവിക്കാതിരിക്കാനാണ് ഇതുവരെ രഹസ്യമാക്കിവെച്ചതെന്നും മുജാഹിദ് എ.എഫ്.പിയോട് പറഞ്ഞു.

മുല്ല ഉമര്‍ മരിച്ച് രണ്ട് വര്‍ഷം കഴിഞ്ഞാണ് മരണവാര്‍ത്ത പോലും താലിബാന്‍ പുറത്തുവിടുന്നത്. അപ്പോഴും ഖബറിടം എവിടെയാണെന്ന കാര്യം മറച്ചുവച്ചു. 2001ല്‍ അമേരിക്ക അധിനിവേശത്തിലൂടെ താലിബാനെ പുറത്താക്കിയതു മുതല്‍ മുല്ല ഉമര്‍ കൊല്ലപ്പെട്ടുവെന്ന തരത്തിലും മറ്റുമായി നിരവധി അഭ്യൂഹങ്ങള്‍ പ്രചരിച്ചിരുന്നു. 2015ലാണ് രണ്ട് വര്‍ഷം അദ്ദേഹം മരിച്ചതായി താലിബാന്റെ സ്ഥിരീകരണം വരുന്നത്. കഴിഞ്ഞ വര്‍ഷം ആഗസ്തിലാണ് താലിബാന്‍ വീണ്ടും അഫ്ഗാനിസ്താന്റെ ഭരണത്തിലേറുന്നത്. 20 വര്‍ഷത്തിനു ശേഷമുള്ള താലിബാന്റെ തിരിച്ചുവരവായിരുന്നു ഇത്.

മുല്ല ഉമറിന്റെ ഖബറിടത്തില്‍ പ്രാര്‍ത്ഥന നടത്തുന്നതിന്റെ ചിത്രങ്ങളും അധികൃതര്‍ പുറത്തുവിട്ടു. വെളുത്ത ചെറിയ ഇഷ്ടികകള്‍ കൊണ്ട് ഖബറിനു ചുറ്റും കെട്ടി നടുവില്‍ ചരല്‍ക്കല്ലുകള്‍ നിരത്തിയിട്ടുണ്ട്. ഖബറിന് അല്‍പം പുറത്തായി എല്ലാ ഭാഗവും ഇരുമ്പ് കൊണ്ട് വേലി കെട്ടി അടച്ച് പച്ച പെയിന്റ് നല്‍കിയതായും കാണാം.

ഇനി മുതല്‍ ജനങ്ങള്‍ക്ക് ഖബറിടം സന്ദര്‍ശിക്കാമെന്നും മുജാഹിദ് പറഞ്ഞു. 1993ല്‍ താലിബാന്‍ സ്ഥാപിച്ച മുല്ല ഉമര്‍ 55ാം വയസ്സിലാണ് മരിക്കുന്നത്. ഒരു പതിറ്റാണ്ട് നീണ്ട സോവിയറ്റ് അധിനിവേശത്തെത്തുടര്‍ന്ന് പൊട്ടിപ്പുറപ്പെട്ട ആഭ്യന്തര ആഭ്യന്തരയുദ്ധത്തിന് മറുമരുന്നായിട്ടായിരുന്നു താലിബാന്റെ ജനനം.