കാഞ്ഞങ്ങാട്: കണ്ണൂര്‍ സര്‍വ്വോദയ സംഘം തലശ്ശേരിയുടെ നേതൃത്വത്തില്‍ ഓണം, ബക്രീദ് ഖാദി വിപണന മേള ഇന്ന് മുതല്‍ സെപ്റ്റംബര്‍ 13വരെ കാഞ്ഞങ്ങാട് വ്യാപാര ഭവനില്‍ നടക്കുമെന്ന് സംഘാടകര്‍ പത്രസമ്മേളനത്തില്‍ അറിയിച്ചു.
മേളയുടെ ഉദ്ഘാടനം രാവിലെ 11ന് നഗരസഭാ  കൗണ്‍സിലര്‍ എച്ച്.ആര്‍ ശ്രീധരന്‍ നിര്‍വഹിക്കും. അഡ്വ.എം.സി ജോസ് ആദ്യ വില്‍പന ഏറ്റുവാങ്ങും. കണ്ണൂര്‍ സര്‍വ്വോദയ സംഘം പ്രസിഡന്റ് പി. പ്രസാദ് ചടങ്ങില്‍ അധ്യക്ഷനാകും. വിവിധ രാഷ്ട്രീയ പാര്‍ട്ടി പ്രതിനിധികളായ ബഷീര്‍ വെള്ളിക്കോത്ത്, ഡി.വി ബാലകൃഷ്ണന്‍, എ.വേലായുധന്‍, വല്‍സലന്‍, എ.വി രാമകൃഷ്ണന്‍ എന്നിവര്‍ ചടങ്ങില്‍ സംസാരിക്കും.
മേളയില്‍ വിവിധയിനം ഖാദി തുണികള്‍, ഖാസി മസ്ലിന്‍, ഡാക്കാ മസ്ലിന്‍, പോളി വസ്ത്ര, സില്‍ക്ക്, റീല്‍ഡ് സില്‍ക്ക്, സാരി, ഉന്നക്കിടക്ക,സോപ്പ്, എണ്ണ, തേന്‍, ചന്ദനത്തിരി  തുടങ്ങിയ ഗ്രാമ വ്യവസായ ഉല്‍പന്നങ്ങള്‍  മേളയിലുണ്ടാകും.
കഴിഞ്ഞ വര്‍ഷം 38 ലക്ഷം രൂപയുടെ വില്‍പനയുണ്ടായ സ്ഥാനത്ത് ഇക്കുറി 60 ലക്ഷം രൂപയുടെ വില്‍പനയാണ്  മേളയുടെ ലക്ഷ്യമെന്നും സംഘാടകര്‍ അറിയിച്ചു.
ഖാദിക്ക് 30 ശതമാനം റിബേറ്റും ആയിരം രൂപയ്ക്ക് മുകളില്‍ സാധനങ്ങള്‍ വാങ്ങുന്നവര്‍ക്ക് പ്രത്യേക സ്വര്‍ണ്ണ സമ്മാന പദ്ധതികളുമുണ്ടാകും. വാര്‍ത്താസമ്മേളനത്തില്‍ സുരേഷ്, എം.വി വിജയ മോഹന്‍, ഇ ബാലന്‍ മാസ്റ്റര്‍, രവീന്ദ്രന്‍ സംബന്ധിച്ചു.