സൈക്ലിള്‍ ചവിട്ടുക എന്നത് സഞ്ചാര മാര്‍ഗത്തിനും, ആരോഗ്യ പരിപാലത്തിനും എന്നതിലുപരി ഒരു ഹോബി കൂടിയായി മാറിയ കാലമാണിത്. നഗരവാസികള്‍ക്കിടയില്‍ മാത്രം പ്രചാരമുണ്ടായിരുന്ന സൈക്ലിങ് എന്ന വിനോദം ഇപ്പോള്‍ ഗ്രാമപ്രദേശങ്ങളിലേക്കും പതിയെ വ്യാപിക്കുന്നുണ്ട്. അതിനാല്‍ തന്നെ മുമ്പ് വിരലിലെണ്ണാവുന്ന ബ്രാന്‍ഡുകള്‍ മാത്രം ഉണ്ടായിരുന്ന സൈക്കിള്‍ ബിസിനസിലേക്ക് ഇപ്പോള്‍ പുതിയ പേരുകള്‍ എത്തുന്നുണ്ട്.

ടാറ്റ ഇന്റര്‍നാഷണലിന്റെ ഉപസ്ഥാപനമായ സ്‌ട്രൈഡര്‍ സൈക്കിള്‍സ് ഇപ്പോള്‍ വിപണിയില്‍ പുത്തന്‍ മോഡലുകള്‍ അവതരിപ്പിക്കുന്ന തിരക്കിലാണ്. അടുത്തകാലത്തായി ധാരാളം പുത്തന്‍ പതിപ്പുകള്‍ പുറത്തിറക്കിയ കമ്പനിയിപ്പോഴിതാ വ്യത്യസ്തമായൊരു സൈക്കിളുമായി വിപണിയിലേക്ക് എത്തിയിരിക്കുകയാണ്. അഡ്വഞ്ചര്‍ സൈക്ലിംഗില്‍ വിപ്ലവം സൃഷ്ടിക്കുമെന്ന് അവകാശപ്പെടുന്ന കോണ്ടിനോ നോയ്‌സി ബോയ് എന്ന മോഡലുമായാണ് ബ്രാന്‍ഡിന്റെ ഇത്തവണത്തെ വരവ്.

12,995 രൂപയാണ് സൈക്കിളിന് മാര്‍ക്കറ്റില്‍ വിലവരുന്നത്. സൈക്ലിങ് ഹോബിയാക്കിയവര്‍ക്ക് മുതല്‍ പ്രൊഫഷണലുകള്‍ക്ക് വരെ ഉപയോഗിക്കാന്‍ കഴിയുന്ന തരത്തില്‍ ഡിസൈന്‍ ചെയ്തിരിക്കുന്ന സൈക്കിളാണ് കോണ്ടിനോ നോയ്‌സി ബോയ്.BMX റൈഡിംഗിനായി പ്രത്യേകം രൂപകല്‍പ്പന ചെയ്തിരിക്കുന്ന കോണ്ടിനോ നോയ്‌സി ബോയ്ക്ക് BMX ഹാന്‍ഡില്‍ബാറുകളും 360 ഡിഗ്രി ഫ്രീസ്‌റ്റൈല്‍ റോട്ടറും വരെ കമ്പനി സജ്ജീകരിച്ചിരിച്ചിട്ടുണ്ട്.

റൈഡര്‍മാര്‍ക്ക് സമാനതകളില്ലാത്ത കണ്‍ട്രോളും എജിലിറ്റിയും വാഗ്ദാനം ചെയ്യുന്ന നൂതന ഘടകങ്ങള്‍ ഇതില്‍ ഉള്‍പ്പെടുത്തിയിട്ടുണ്ടെന്നും കമ്പനി പറയുന്നു. പ്രത്യേകം രൂപകല്‍പ്പന ചെയ്ത യുബ്രേക്കുകള്‍ എക്‌സ്ട്രീം കണ്‍ട്രോളാണ് നല്‍കുന്നത്. ഇവയെല്ലാം സുരക്ഷിതവും ആനന്ദദായകവുമായ റൈഡാണ് ഉറപ്പാക്കുന്നത്. ഇന്റഗ്രേറ്റഡ് സ്റ്റണ്ട് പെഗ്ഗുകളോടെ BMX സാഹസികതകളുടെയും സ്റ്റണ്ടുകളുടെയും ലോകത്തേക്ക് ആര്‍ക്കും കടന്നുചെല്ലാന്‍ നോയ്‌സി ബോയ് സൈക്കിള്‍ ഉപയോഗപ്പെടുത്താം.

സൈക്കിളിന്റെ ലോഞ്ചിങ് പ്രമാണിച്ച് കമ്പനി ഇപ്പോള്‍ ഓഫറുകളും പ്രഖ്യാപിച്ചിട്ടുണ്ട്. 4,335 രൂപയുടെ ഡിസ്‌ക്കൗണ്ടാണ് നോയ്‌സി ബോയ് സൈക്കിളിന് ലോഞ്ചിങ് പീരിഡില്‍ ലഭിക്കുന്നത്. കൂടാതെ മൗണ്ടന്‍ ബൈക്കുകള്‍, ഫാറ്റ് ബൈക്കുകള്‍, ബിഎംഎക്‌സ് ബൈക്കുകള്‍, ഹൈ പെര്‍ഫമോന്‍സ് സിറ്റി ബൈക്കുകള്‍ എന്നിവയുള്‍പ്പെടെ വിവിധ മള്‍ട്ടിസ്പീഡ് ഓപ്ഷനുകളുള്ള സൈക്കിളുകളും ടാറ്റ ഇന്റര്‍നാഷണലിന്റെ ഉപസ്ഥാപനമായ സ്‌ട്രൈഡര്‍ സൈക്കിള്‍സ് വാഗ്ദാനം ചെയ്യുന്നത്.