സ്റ്റാഫ് മീറ്റിംഗില്‍ കയറി അധ്യാപകരെ ആക്രമിച്ച സംഭവം; ബി.ജെ.പി അധ്യാപക സംഘടനാ നേതാവ് ഷാജി അറസ്റ്റിൽ

കോഴിക്കോട്: നരിക്കുനി എരവന്നൂര്‍ എ.യു.പി സ്‌കൂളില്‍ അധ്യാപകരെ കയ്യേറ്റം ചെയ്ത ബി.ജെ.പി അധ്യാപക സംഘടനയായ എന്‍.ടി.യു നേതാവ് എം.പി ഷാജിയെ അറസ്റ്റ് ചെയ്തു. സ്‌കൂള്‍ ഓഫിസില്‍ ചേര്‍ന്ന സ്റ്റാഫ് മീറ്റിംഗില്‍ അന്യായമായി കടന്നു കയറി പ്രധാന അധ്യാപിക ഉൾപ്പെടെ നിരവധി അധ്യാപകരെ കയ്യേറ്റം ചെയ്ത കേസിലാണ് അറസ്റ്റ്.

പോലൂര്‍ സ്‌കൂള്‍ അധ്യാപകനും ബി.ജെ.പി അധ്യാപക സംഘടനയായ എന്‍.ടി.യുവിന്റെ ജില്ല ഭാരവാഹിയുമായ ഷാജിയാണ് തങ്ങളെ മര്‍ദിച്ചതെന്ന് പരുക്കേറ്റ് മെഡിക്കല്‍ കോളജില്‍ ചികിത്സയില്‍ കഴിയുന്ന അധ്യാപകര്‍ വ്യക്തമാക്കിയിരുന്നു. പി. ഉമ്മര്‍, വീണ, മുഹമ്മദ് ആസിഫ്, അനുപമ, ജസ്സ എന്നിവര്‍ക്കാണ് പരുക്കേറ്റത്. സംഭവത്തിന്റെ വിഡിയോ ദൃശ്യം സമൂഹമാധ്യമനകളിൽ ഉൾപ്പെടെ പ്രചരിച്ചിരുന്നു.

ഷാജിയുടെ ഭാര്യയും എരവന്നൂര്‍ എ.യു.പി സ്‌കൂള്‍ അധ്യാപികയുമായ സുപ്രീനക്കെതിരെ നിലനിൽക്കുന്ന ഒരു കേസുമായി ബന്ധപ്പെട്ട് ഉണ്ടായ തര്‍ക്കമാണ് അടിയില്‍ കലാശിച്ചത്. ഒരു രക്ഷിതാവ് ചൈല്‍ഡ് ലൈനിലും പൊലിസിനും സുപ്രീനക്കെതിരെ നല്‍കിയ പരാതി അന്വേഷണത്തിലിരിക്കെ സഹപ്രവര്‍ത്തകനായ മറ്റൊരു അധ്യാപകനെതിരെ സുപ്രീന പൊലിസില്‍ വിളിച്ച് പരാതി നല്‍കുകയും പൊലിസ് അന്വേഷണത്തിന് സ്‌കൂളില്‍ എത്തുകയും ചെയ്തിരുന്നു. ഇത് സ്‌കൂള്‍ പ്രധാന അധ്യാപിക പോലും അറിഞ്ഞിരുന്നില്ല. ഈ സാഹചര്യത്തിലായിരുന്നു സ്റ്റാഫ് മീറ്റിംഗ് സംഘടിപ്പിച്ചത്.

രക്ഷിതാവിനും കുട്ടിക്കുമില്ലത്ത പരാതി സഹപ്രവര്‍ത്തകനെതിരെ പൊലിസില്‍ വിളിച്ചു പറഞ്ഞത് ചര്‍ച്ച ചെയ്യാനും ഈ വിവരം വിദ്യാര്‍ഥിയുടെ രക്ഷിതാവ് അറിയുകയും പരാതിയുമായി മുന്നോട്ട് പോവരുതെന്ന് അധ്യാപികയോട് ആവശ്യപ്പെടുകയും ചെയ്ത സാഹചര്യത്തില്‍ വിളിച്ചു ചേര്‍ത്ത സ്റ്റാഫ് മീറ്റിങ്ങിലാണ് കയ്യാങ്കളി ഉണ്ടായത്. നാട്ടുകാരും പൊലിസും എത്തിയാണ് രംഗം ശാന്തമാക്കിയത്.

സംഭവത്തിൽ കാക്കൂര്‍ പൊലിസ് കേസ് രജിസ്റ്റര്‍ ചെയ്തിരുന്നു. പരുക്കേറ്റ അധ്യാപകരില്‍ നിന്നും പൊലിസ് മൊഴി രേഖപ്പെടുത്തിയിട്ടുണ്ട്. ഇതിന് പിന്നാലെയാണ് അറസ്റ്റ്.

വിവിധ അധ്യാപക സംഘടനകള്‍ ഇതിനെതിരെ പ്രതിഷേധവുമായി രംഗത്തെത്തിയിട്ടുണ്ട്. എന്നാല്‍ ബി.ജെ.പിയുടെ അധ്യാപക സംഘടനയായ എന്‍.ടി.യു കൊടുവള്ളി ഉപജില്ല കമ്മിറ്റി ഇറക്കിയ വാര്‍ത്താകുറിപ്പ് ഷാജിയെയും അവിടെ ജോലി ചെയ്യുന്ന സുപ്രീനയെയും സ്‌കൂളിലെ അധ്യാപകര്‍ കൂട്ടത്തോടെ മര്‍ദിച്ചുവെന്നാണ് ആരോപിക്കുന്നത്.