ഭുവനേശ്വര്‍: സ്‌കൂള്‍ കായിക മത്സരം നടക്കുന്നതിനിടെ വിദ്യാര്‍ത്ഥിയുടെ കഴുത്തില്‍ ജാവലിന്‍ തുളച്ചു കയറി. ഒഡീഷയിലെ ബലംഗീര്‍ ജില്ലയില്‍ ശനിയാഴ്ചയാണ് സംഭവം.

അഗല്‍പൂര്‍ ബോയ്‌സ് ഹൈസ്‌കൂളില്‍ കായികമേളക്കിടെ സദാനന്ദ മെഹര്‍ എന്ന ഒമ്പതാം ക്ലാസ് വിദ്യാര്‍ത്ഥിക്കാണ് പരിക്കേറ്റത്. മറ്റൊരു വിദ്യാര്‍ഥി എറിഞ്ഞ ജാവലിന്‍ മെഹറിന്റെ കഴുത്തില്‍ തുളച്ച് കയറുകയായിരുന്നു. കഴുത്തില്‍ ഗുരുതരമായി പരിക്കേറ്റ വിദ്യാര്‍ഥിയെ ഉടന്‍ തന്നെ അധ്യാപകര്‍ ചേര്‍ന്ന് ആശുപത്രിയില്‍ പ്രവേശിപ്പിച്ചു. കഴുത്തില്‍ കുടുങ്ങിയ ജാവലിന്‍ സഹിതമാണ് കുട്ടിയെ ആശുപത്രിയിലെത്തിച്ചത്.

ജാവലിന്‍ കഴുത്തില്‍ നിന്ന് സുരക്ഷിതമായി നീക്കം ചെയ്തതെന്നും നിലവില്‍ കുട്ടി അപകടനില തരണം ചെയ്തതെന്നും ആശുപത്രി അധികൃതര്‍ അറിയിച്ചു. കുട്ടി ഇപ്പോള്‍ ഐ.സി.യുവിലാണ്.

വിദ്യാര്‍ത്ഥിയുടെ ചികിത്സക്കായി ധനസഹായം നല്‍കുമെന്ന് ജില്ലാ കലക്ടര്‍ അറിയിച്ചു. കുട്ടിക്ക് മെച്ചപ്പെട്ട ചികിത്സ ലഭ്യമാക്കണമെന്ന് മുഖ്യമന്ത്രി നവീന്‍ പട്‌നായിക് ഉദ്യോഗസ്ഥര്‍ക്ക് നിര്‍ദശം നല്‍കിയിട്ടുണ്ട്.