കല്‍പ്പറ്റ: മത പരിവര്‍ത്തനം ചെയ്യപ്പെട്ട ആദിവാസി യുവാവിനെ തിരികെ ലഭിക്കണമെന്ന് ഭാര്യ. മൂപ്പൈനാട് പഞ്ചായത്തിലെ റിപ്പണ്‍ വാളത്തൂര്‍ 14 കോളനിയിലെ തച്ചനാടന്‍ മൂപ്പന്‍ വിഭാഗത്തില്‍പെട്ട വാസു(36)വിന്റെ ഭാര്യ ഷീജയാണ് വാര്‍ത്താസമ്മേളനത്തില്‍ ഈ ആവശ്യം ഉന്നയിച്ചത്.
പണിക്കു പോവുകയാണെന്ന് പറഞ്ഞ് ജൂലൈ 13ന് വീട്ടില്‍ നിന്നു പോയ വാസു മതപരിവര്‍ത്തനത്തിന് വിധേയനായെന്നാണ് വിവരമെന്ന് ഷീജയും ബന്ധുക്കളും പറഞ്ഞു. ജ്യേഷ്ഠന്‍ നാരായണനെ ഇടക്ക് വാസു ഫോണില്‍ വിളിച്ചിരുന്നു. പൊലിസില്‍ പരാതികൊടുത്താല്‍ കൊല്ലുമെന്ന് വാസു തന്നെ ഭീഷണിപ്പെടുത്തിയെന്ന് നാരായണന്‍ ആരോപിച്ചു. ഇതുവരെ ഭാര്യയെയും കുട്ടികളെയും കാണാന്‍ വാസു വന്നിട്ടില്ല. ഷീജയും രണ്ട് കുട്ടികളും അനാഥരായിരിക്കുകയാണ്.
രണ്ട് പിഞ്ചുകുട്ടികളാണ് വാസുവിനുള്ളത്. വാസുവിനെ കാണാതായതിനെ തുടര്‍ന്ന് ഒരാഴ്ച കഴിഞ്ഞ് മേപ്പാടി പൊലിസില്‍ പരാതി നല്‍കി. പൊലിസ് അന്വേഷണത്തില്‍ വാസു മഞ്ചേരിയിലുള്ള സത്യസരണി എന്ന ഒരു മതസ്ഥാപനത്തില്‍ ഉണ്ടെന്ന് വിവരം ലഭിച്ചു. പിന്നീട് മേപ്പാടി പൊലിസും ബന്ധുക്കളും സത്യസരണിയിലെത്തി. പൊലിസ് അകത്തു ചെന്ന് വാസുവിനോട് സംസാരിച്ചുവെന്ന് ബന്ധുക്കള്‍ പറഞ്ഞു. മറ്റാരെയും ഉള്ളിലേക്ക് കടത്തിവിട്ടില്ല.
സ്വമനസാലെ താന്‍ മതം മാറിയതെന്ന് വാസു പറഞ്ഞതായാണ് പൊലിസ് അറിയിച്ചത്. നിലവില്‍ ഷീജയും കുട്ടികളും വാസുവിന്റെ സഹോദരങ്ങളോടൊപ്പം ഒരു വീട്ടിലാണ് കഴിയുന്നത്. വാസു തിരിച്ചു വരാത്തതിനാല്‍ ഷീജയും മക്കളും ആശങ്കയിലാണ്. ഇവരുടെ ഉത്തരവാദിത്വവും സംരക്ഷണവും ചോദ്യചിഹ്നമായി മാറിയിരിക്കുകയാണെന്നും ബന്ധുക്കള്‍ പറഞ്ഞു. സഹോദരി ഓമനയും മറ്റ് ബന്ധുക്കളും വാര്‍ത്താസമ്മേളനത്തില്‍ പങ്കെടുത്തു.