കൊല്‍ക്കത്ത: ബംഗാള്‍ മുഖ്യമന്ത്രി മമതാ ബാനര്‍ജിയുടെ വിധിയെഴുത്ത് ഇന്ന് നടക്കും. തൃണമൂല്‍ കോണ്‍ഗ്രസ് നേതാവായ മമത മത്സരിക്കുന്ന ഭവാനിപൂര്‍ മണ്ഡലത്തിലെ വോട്ടെടുപ്പ് ഇന്നാണ്. ഒക്ടോബര്‍ മൂന്നിനാണ് വോട്ടെണ്ണല്‍. 

 

കനത്ത സുരക്ഷയാണ് മണ്ഡലത്തില്‍ ഏര്‍പ്പെടുത്തിയിരിക്കുന്നത്. 15 കമ്പനി കേന്ദ്രസേനയെ വിന്യസിച്ചതായി മുതിര്‍ന്ന പൊലിസ് ഉദ്യോഗസ്ഥര്‍ പറഞ്ഞു. 

പോളിങ് ബൂത്തുകളുടെ 200 മീറ്റര്‍ ചുറ്റളവില്‍ നിരോധനാജ്ഞ പ്രഖ്യാപിച്ചിട്ടുണ്ട്. ബി.ജെ.പിയുടെ പ്രിയങ്കാ തിബര്‍വാളാണ് മമതയെ നേരിടുന്നത്. സി.പി.എമ്മിന്റെ ശ്രിജിബ് ബിശ്വാസും മത്സര രംഗത്തുണ്ട്. മണ്ഡലത്തില്‍ 97 പോളിങ് സെന്ററുകളിലായി 287 ബൂത്തുകളാണ് സജ്ജീകരിച്ചിട്ടുള്ളത്. 

 

പകുതി ബൂത്തുകളിലും മൂന്ന് കേന്ദ്ര സേനാംഗങ്ങളുണ്ടാകും. ബൂത്തിനു പുറത്തുള്ള സുരക്ഷാ ചുമതല കൊല്‍ക്കത്ത പൊലിസിനാണ്. ബൂത്തിന് 200 മീറ്റര്‍ ചുറ്റളവില്‍ അഞ്ചില്‍ കൂടുതലാളുകള്‍ കൂടിച്ചേരുന്നത് അനുവദിക്കില്ല. 

 

ഭവാനിപൂര്‍ മണ്ഡലത്തിലെ 38 മേഖലകളില്‍ പൊലിസ് പിക്കറ്റുകളുണ്ടാകും. ബംഗാള്‍ പൊലിസിലെ 22 സെക്ടര്‍ മൊബൈലുകള്‍, ഒന്‍പത് ഹെവി റേഡിയോ ഫ്‌ളയിങ് സ്‌ക്വാഡുകള്‍, 13 ക്വിക് റെസ്‌പോണ്‍സ് ടീമുകള്‍, ഒമ്പത് അംഗങ്ങളടങ്ങുന്ന സ്റ്റാറ്റിക് സര്‍വെയ്‌ലന്‍സ് ടീമുകള്‍, ഫ്‌ളയിങ് സ്‌ക്വാഡ്, സ്‌ട്രൈക്കിങ് ഫോഴ്‌സ് എന്നിവരും സുരക്ഷാ ചുമതലയുമായി ഉണ്ടാകും. 

 

ഒരു അഡിഷനല്‍ കമ്മിഷണര്‍, നാലു ജോയിന്റ് കമ്മിഷണര്‍മാര്‍, 14 ഡെപ്യൂട്ടി കമ്മിഷണര്‍മാര്‍, അസിസ്റ്റന്റ് കമ്മിഷണര്‍മാര്‍ എന്നിവരാണ് സുരക്ഷാ മേല്‍നോട്ടം വഹിക്കുക. 

വോട്ടിങ് മെഷിന്‍ സൂക്ഷിക്കാന്‍ ശെഖാവത്ത് മെമോറിയല്‍ ഗവ. ഹൈസ്‌കൂളില്‍ രണ്ട് സ്‌ട്രോങ് റൂമുകള്‍ ഒരുക്കിയിട്ടുണ്ട്. ന്യൂനമര്‍ദത്തെ തുടര്‍ന്ന് കനത്ത മഴ തുടരുന്നതിനാല്‍ കാലാവസ്ഥാ മുന്നറിയിപ്പ് പ്രകാരം പ്രവര്‍ത്തിക്കാനും ഉദ്യോഗസ്ഥര്‍ക്ക് നിര്‍ദേശം നല്‍കിയിട്ടുണ്ട്.