ജമ്മു കശ്മീരിന്റെ പ്രത്യേക പദവി: ഹരജികളില്‍ വിധി ഇന്ന്

ന്യൂഡല്‍ഹി: ജമ്മുകശ്മീരിന് പ്രത്യേക പദവി നല്‍കുന്ന ഭരണഘടനയുടെ 370ാം വകുപ്പ് കേന്ദ്ര സര്‍ക്കാര്‍ എടുത്തുകളഞ്ഞതിനെതിരെ സമര്‍പ്പിച്ച ഹരജികളില്‍ വിധി ഇന്ന്. കേന്ദ്ര നടപടിക്കെതിരെ സമര്‍പ്പിച്ച ഹരജികളില്‍ ചീഫ് ജസ്റ്റിസ് ഡി.വൈ. ചന്ദ്രചൂഡ്, ജസ്റ്റിസുമാരായ സഞ്ജയ് കിഷന്‍ കൗള്‍, സഞ്ജീവ് ഖന്ന, ബി.ആര്‍. ഗവായ്, സൂര്യകാന്ത് എന്നിവരടങ്ങുന്ന അഞ്ചംഗ ഭരണഘടന ബെഞ്ചാണ് വിധി പറയുന്നത്.

2019 ആഗസ്റ്റില്‍ കേന്ദ്ര സര്‍ക്കാര്‍ 370ാം വകുപ്പിലെ നിബന്ധനകള്‍ റദ്ദാക്കിയതിനും ജമ്മുകശ്മീരിന്റെ സംസ്ഥാന പദവി എടുത്തുകളഞ്ഞ് കേന്ദ്രഭരണപ്രദേശമാക്കി മാറ്റിയതിനുമെതിരെ സുപ്രിംകോടതിയില്‍ നല്‍കിയ ഹരജികളിലാണ് വിധി പറയുക. 2020ല്‍ സമര്‍പ്പിക്കപ്പെട്ട ഹരജികളില്‍ ഈ വര്‍ഷം ആഗസ്റ്റ് അഞ്ചു മുതല്‍ വാദംകേട്ട അഞ്ചംഗ ബെഞ്ച് ഇക്കഴിഞ്ഞ സെപ്തംബറിലാണ് വിധി പറയാനായി കേസ് മാറ്റിയത്. ഹരജികളിലെ വിധി കേന്ദ്രത്തിന് ഏറെ നിര്‍ണായകമാണ്.