തിരുവനന്തപുരം
കൊവിഡിന് ശേഷം സർവിസ് നടത്തുന്ന ഇലക്ട്രിക്ക് ബസുകൾ നഷ്ടത്തിലാണെന്നും അതുകൊണ്ട് കരാർ റദ്ദാക്കാനുള്ള നടപടികൾ ആരംഭിച്ചെന്നും മന്ത്രി ആന്റണി രാജു നിയമസഭയെ അറിയിച്ചു.
മഹാരാഷ്ട്ര ആസ്ഥാനമായ മഹാവോയേജ് എന്ന കമ്പനിക്കാണ് കരാർ നൽകിയിരുന്നത്. 10 ബസുകളാണ് കരാറിലെടുത്തത്. അതിൽ എട്ടെണ്ണം ഓടുന്നില്ല. രണ്ടെണ്ണം കെ.എം.ആർ.എല്ലിന് നൽകിയിട്ടുണ്ട്. ഇന്ധനക്ഷമത കൂടൂതലുള്ള സി.എൻ.ജി ബസുകൾ പ്രോത്സാഹിപ്പിക്കാനാണ് തീരുമാനം. ഇതിന് മുന്നോടിയായി 3,000 ഡീസൽ ബസുകൾ സി.എൻ.ജിയിലേക്ക് മാറ്റാനുള്ള നടപടികൾ പുരോഗമിക്കുന്നു. പുതുതായി 460 ബസുകൾ വാങ്ങാൻ തീരുമാനിച്ചു.
യാത്രാക്ലേശം പരിഹരിക്കാൻ ആവശ്യമുള്ള സ്ഥലങ്ങളിലേക്ക് കൂടുതൽ സർവിസുകൾ നടത്തും. ഇതുവരെയുള്ള ശമ്പള, പെൻഷൻ കുടിശ്ശിക കൊടുത്തുതീർത്തു. ഈ മാസത്തെ ശമ്പളവും പെൻഷനും ധനവകുപ്പിന്റെ അനുമതി ലഭിക്കുന്ന മുറയ്ക്ക് നൽകും. കാലാവധി കഴിഞ്ഞ 1,000 ബസുകൾ പൊളിക്കും. എംപാനൽ ജീവനക്കാരുടെ കാര്യം ഹൈക്കോടതിയുടെ ഉത്തരവനുസരിച്ച് അനുഭാവപൂർവം പരിഗണിക്കും. അന്തർസംസ്ഥാന സർവിസുകൾ പുനരാരംഭിക്കുന്നത് സംബന്ധിച്ച ചർച്ചകൾ പുരോഗമിക്കുന്നതായും മന്ത്രി പറഞ്ഞു.