യൂറോപ്പ് അടക്കമുള്ള വിദേശ രാജ്യങ്ങളിലേക്ക് കുടിയേറാന്‍ ഏറ്റവും അത്യാവശ്യമായി വരുന്ന ഘടകമാണ് ഭാഷ. ജര്‍മ്മനി, ഇംഗ്ലണ്ട്, അമേരിക്ക, മറ്റ് യൂറോപ്യന്‍ രാജ്യങ്ങള്‍ എന്നിവിടങ്ങളിലേക്ക് ഭാഷ ഒരു മുഖ്യ ഘടകമാണ്. ആഗോള അംഗീകാരമുള്ള ഐ.ഇ.എല്‍.ടി.എസ്, ഒഇടി പരീക്ഷകളാണ് പല വിദേശ രാജ്യങ്ങളും അടിസ്ഥാനമാക്കുന്നത്. ഇത്തരം പരീക്ഷകളില്‍ കേരളത്തില്‍ നിന്നടക്കം പ്രതിവര്‍ഷം പതിനായിരക്കണക്കിന് ആളുകളാണ് പങ്കെടുക്കുന്നത്. 

സംസ്ഥാന സര്‍ക്കാര്‍ സ്ഥാപനമായ നോര്‍ക്ക ഇന്‍സ്റ്റിറ്റ്യൂട്ട് ഓഫ് ഫോറിന്‍ ലാംഗ്വേജസിന് കീഴില്‍ തിരുവനന്തപുരം, കോഴിക്കോട് സെന്ററുകളിലായി പുതിയ ഒഇടി, ഐ.ഇ.എല്‍.ടി.എസ് കോഴ്‌സുകളിലേക്ക് അപേക്ഷ ക്ഷണിച്ചിട്ടുണ്ട്. ഓഫ്‌ലൈന്‍, ഓണ്‍ലൈന്‍ ക്ലാസുകളാണ് നടക്കുക. ജര്‍മ്മന്‍ എ1, എ2, ബി1 (ഓണ്‍ലൈന്‍) കോഴ്‌സുകളിലേക്ക് ഏപ്രില്‍ 27നകം അപേക്ഷ നല്‍കാമെന്നാണ് നോര്‍ക്ക അറിയിച്ചിട്ടുള്ളത്. താല്‍പര്യമുള്ള ഉദ്യോഗാര്‍ഥികള്‍ www.nifl.norkaroots.org എന്ന വെബ്‌സൈറ്റ് സന്ദര്‍ശിക്കുക. 

കോഴ്‌സ് വിജയകരമായി പൂര്‍ത്തിയാക്കുന്ന ആരോഗ്യ മേഖലയിലെ പ്രൊഫഷനലുകള്‍ക്ക് നോര്‍ക്ക റൂട്ട്‌സ് വഴി വിദേശത്ത് ജോലി കണ്ടെത്തുന്നതിനും അവസരമുണ്ടായിരിക്കും. എന്‍.ഐ.എഫ്.എല്‍ സെന്ററുകളില്‍ ഓഫ്‌ലൈന്‍ ക്ലാസുകളുടെ സമയം രാവിലെ ഒന്‍പത് മണി മുതല്‍ ഉച്ചക്ക് 1.00 മണി വരെയാണ്. ഉച്ചകഴിഞ്ഞുള്ള സെഷന്‍ 1.00 മണി മുതല്‍ വൈകീട്ട് 5.00 മണിവരെയും നടക്കും. 

തിങ്കള്‍ മുതല്‍ വെള്ളി വരെയാണ് ക്ലാസുകള്‍. ഓണ്‍ലൈന്‍ ബാച്ച് രാവിലെ 7 മുതല്‍ 9 വരെ, അല്ലെങ്കില്‍ വൈകീട്ട് 7 മുതല്‍ 9 വരെയും നടക്കും. ഒഇടി, ഐ.ഇ.എല്‍.ടി.എസ് ലൈന് ബാച്ചുകളുടെ കോഴ്‌സ് ദൈര്‍ഘ്യം രണ്ട് മുതല്‍ മൂന്ന് മാസവും, ഓണ്‍ലൈന്‍ ക്ലാസുകളുടെ ദൈര്‍ഘ്യം ഒരു മാസവുമായിരിക്കും. മുന്‍ കാലങ്ങളില്‍ ഒഇടി, ഐ.ഇ.എല്‍.ടി.എസ് പരീക്ഷ എഴുതിയവര്‍ക്ക് മാത്രമായിരിക്കും ഓണ്‍ലൈന്‍ ബാച്ചിലേക്കുള്ള പ്രവേശനമെന്നും നോര്‍ക്ക അറിയിച്ചിട്ടുണ്ട്.

ഫീസ്, മറ്റ് സംശയങ്ങള്‍, കൂടുതല്‍ വിവരങ്ങള്‍ക്കുമായി ബന്ധപ്പെടുക: 

 +91-7907323505 (തിരുവനന്തപുരം) + 91- 8714259444 (കോഴിക്കോട്). 

അല്ലെങ്കില്‍ നോര്‍ക്കയുടെ ഗ്ലോബല്‍ കോണ്‍ടാക്ട് സെന്ററിന്റെ ടോള്‍ ഫ്രീ നമ്പറായ 1800 425 3939 (ഇന്ത്യയില്‍ നിന്ന്), + 91-8802 012 345 (വിദേശത്ത് നിന്നും) മിസ്ഡ് കോള്‍ സര്‍വീസ് മുഖേന ബന്ധപ്പെടാവുന്നതാണ്. 

കൂടുതൽ തൊഴിൽ വാർത്തകള്‍ക്ക് ഗ്രൂപ്പിൽ ജോയിന്‍ ചെയ്യുക