ജയ്പൂര്‍: നാടന്‍ പശുവിന്റെ പാല്‍കുടിച്ചാല്‍ ബുദ്ധി വര്‍ധിക്കുമെന്ന് രാജസ്ഥാന്‍ വിദ്യാഭ്യാസ മന്ത്രി മദന്‍ ദിലാവര്‍. എരുമപ്പാല്‍ കുടിക്കുന്നത് കുട്ടികളെ അലസരാക്കി മാറ്റുമെന്നും, അതിനാല്‍ പശുവിന്‍ പാല്‍ പ്രോത്സാഹിപ്പിക്കണമെന്നും മന്ത്രി പറഞ്ഞു. രാജസ്ഥാനിലെ കോട്ടയില്‍ രംഗഞ്ച് മണ്ഡിയില്‍ നടന്ന ഗോസംരക്ഷ ചടങ്ങിലാണ് വിചിത്ര വാദമുയര്‍ത്തി വിദ്യാഭ്യാസ മന്ത്രി തന്നെ രംഗത്തെത്തിയത്. 

പശുക്കിടാവിനെയും, എരുക്കിടാവിനെയും താരതമ്യം ചെയ്തായിരുന്നു മന്ത്രിയുടെ വാദം. ഉയര്‍ന്ന തോളുകളുള്ള നാടന്‍ പശുക്കളുടെ പാല്‍ കുടിക്കുന്നവര്‍ ബുദ്ധിശാലികളാകും. എന്നാല്‍ എരുമപ്പാല്‍ കുടിക്കുന്നവര്‍ക്ക് മന്ദതയുണ്ടാകുമെന്നും, അവര്‍ക്ക് കാര്യങ്ങള്‍ വേഗത്തില്‍ ഗ്രഹിക്കാന്‍ കഴിയില്ല. പശുക്കിടാവിന് പാല്‍ നല്‍കിയാല്‍ അത് ഊര്‍ജവും പ്രസരിപ്പുള്ളതുമായി മാറും, എന്നാല്‍ എരുമക്കിടാവിന് പാല്‍ നല്‍കിയാല്‍ അത് അലസമായി ഉറങ്ങുകയാണ് ചെയ്യുന്നത്,' മന്ത്രി പറഞ്ഞു. 

ALSO READ: തമിഴകം പിടിക്കാന്‍ പുതിയ പാര്‍ട്ടിയുമായി ശശികല; ജയലളിതയുടെ ജന്മദിനത്തില്‍ പ്രഖ്യാപനം 

മന്ത്രിയുടെ വിവാദ പ്രസ്താവന ഇതിനോടകം സോഷ്യല്‍ മീഡിയയില്‍ വ്യാപകമായി പ്രചരിക്കുന്നുണ്ട്. ശാസ്ത്രീയമായി യാതൊരു അടിസ്ഥാനവുമില്ലാത്ത വാദം വിദ്യാഭ്യാസ മന്ത്രി തന്നെ നടത്തുമ്പോള്‍, നാട്ടിലെ വിദ്യാര്‍ഥികളുടെ അവസ്ഥ എന്താകുമെന്നും ചോദ്യം ഉയരുന്നുണ്ട്. പ്രത്യേക തരം പാല്‍ കുടിക്കുന്നത് ബുദ്ധിശക്തിയില്‍ വര്‍ധിക്കാനോ, കുറയാനോ കാരണമാകുമെന്ന് തെളിയിക്കുന്ന ശാസ്ത്രീയ പഠനങ്ങളൊന്നും നിലവിലില്ലെന്ന് വിദഗ്ദര്‍ ചൂണ്ടിക്കാട്ടുന്നു.