അല്‍ ഐന്‍: യു.എ.ഇയുടെ പൂന്തോട്ട നഗരമായ അല്‍ ഐനില്‍ ലുലു ഗ്രൂപ്പിന്റെ പുതിയ ഹൈപര്‍ മാര്‍ക്കറ്റ് പ്രവര്‍ത്തനമാരംഭിച്ചു. നഗരത്തിന്റെ പ്രാന്തപ്രദേശമായ സനാഇയക്കടുത്ത അല്‍ അജയാസിലുള്ള ഹൈപര്‍ മാര്‍ക്കറ്റ് യു.എ.ഇ ഫെഡറല്‍ നാഷണല്‍ കൗണ്‍സില്‍ മുന്‍ അംഗം ശൈഖ് സാലിഹ് ബല്‍ റക്കാദ് അല്‍ ആമിരി ഉദ്ഘാടനം ചെയ്തു.

40,000 ചതുരശ്രയടി വിസ്തീര്‍ണത്തിലുള്ള ഹൈപര്‍ മാര്‍ക്കറ്റില്‍ സൂപര്‍ മാര്‍ക്കറ്റ്, ഹോട്ട് ഫുഡ്‌സ്, ഫ്രഷ് ഫുഡ്, ബേക്കറി, ഇലക്‌ട്രോണിക്‌സ്, സ്റ്റേഷനറി തുടങ്ങിയ വിഭാഗങ്ങളുണ്ട്. ലുലു ഗ്രൂപ്പിന്റെ അല്‍ ഐനിലെ പതിനാറാമത്തെ ഹൈപര്‍ മാര്‍ക്കറ്റാണിത്. വിവിധ ജനസമൂഹങ്ങളെ സേവിക്കാനായി ലുലു ഗ്രൂപ് ആരംഭിച്ച ഹൈപര്‍ മാര്‍ക്കറ്റ് പ്രദേശത്ത് താമസിക്കുന്നവര്‍ക്കും സമീപ പ്രദേശങ്ങളിലുള്ളവര്‍ക്കും ഉപകാരപ്രദമായിരിക്കുമെന്ന് ലുലു ഗ്രൂപ് എക്‌സിക്യൂട്ടീവ് ഡയറക്ടര്‍ എം.എ അഷ്‌റഫ് അലി പറഞ്ഞു. 

അടുത്ത വര്‍ഷാവസാനത്തോടെ അല്‍ ഐനില്‍ മൂന്ന് പുതിയ ഹൈപര്‍ മാര്‍ക്കറ്റുകള്‍ കൂടി ആരംഭിക്കും. ഉള്‍പ്രദേശങ്ങളിലെ ഉപഭോക്താക്കള്‍ക്കും ദീര്‍ഘ ദൂരം യാത്ര ചെയ്യാതെ വേണ്ടതെല്ലാം വാങ്ങാനാവുകയെന്ന ലക്ഷ്യത്തോടെയാണ് പ്രവര്‍ത്തനം വ്യാപിപ്പിക്കുന്നത്. യു.എ.ഇ ഭരണാധികാരികള്‍ നല്‍കുന്ന പിന്തുണക്ക് അദ്ദേഹം നന്ദി  പറഞ്ഞു. ലുലു ഗ്രൂപ് സി.ഇ.ഒ സൈഫി രൂപാവാല, ഗ്രൂപ് ഡയറക്ടര്‍ എം.എ സലീം, ലുലു അല്‍ ഐന്‍ റീജ്യണല്‍ ഡയറക്ടര്‍ ഷാജി ജമാലുദ്ദീന്‍ എന്നിവര്‍ സംബന്ധിച്ചു.

കൂടുതൽ ഗൾഫ് വാർത്തകൾ ലഭിക്കാൻ ഗ്രൂപ്പിൽ ജോയിൻ ചെയ്യുക: