അബൂദബി: അബൂദബി സായിദ് രാജ്യാന്തര വിമാനത്താവളത്തില്‍ നിന്ന് യാത്ര ചെയ്യുന്ന യാത്രക്കാര്‍ക്കായി അല്‍ ഐനില്‍ പുതിയ സിറ്റി ചെക്ക് ഇന്‍ സേവനം ആരംഭിച്ചു. മുസഫയിലും യാസ് മാളിലും സേവന കേന്ദ്രങ്ങള്‍ ആരംഭിച്ചതിന് ശേഷം അബൂദബി എമിറേറ്റില്‍ ഈവര്‍ഷം ആരംഭിക്കുന്ന മൂന്നാമത്തെ സൗകര്യമാണിത്. അല്‍ ഐനിലെ ഗാര്‍ഡന്‍ സിറ്റിയിലെ സൗകര്യം സായിദ് വിമാനത്താവളത്തില്‍ നിന്ന് എത്തിഹാദ് എയര്‍വേയ്‌സ്, എയര്‍ അറേബ്യ, വിസ് എയര്‍, ഈജിപ്ത് എയര്‍ എന്നിവയില്‍ പറക്കുന്ന യാത്രക്കാര്‍ക്ക് സേവനം ലഭിക്കും. 

യാത്രക്കാര്‍ക്ക് അവരുടെ വിമാനങ്ങള്‍ പുറപ്പെടുന്നതിന് 24 മുതല്‍ ഏഴു മണിക്കൂര്‍ മുമ്പ് വരെ ബാഗേജ് കൈമാറാനും ബോര്‍ഡിങ് പാസുകള്‍ നേടാനും കഴിയുമെന്ന് മൊറാഫിഖ് ഏവിയേഷന്‍ സര്‍വിസസ് അറിയിച്ചു. അല്‍ ഐന്‍ ലൊക്കേഷനില്‍ ചെക്ക് ഇന്‍ ചെയ്യുന്നതിലൂടെ യാത്രക്കാര്‍ക്ക് അബൂദബി വിമാനത്താവളത്തിലെ നീണ്ട ക്യൂ ഒഴിവാക്കാനും അവരുടെ ലഗേജുകള്‍ മുന്‍കൂട്ടി നല്‍കാനും കൂടുതല്‍ ശാന്തമായ യാത്ര ആസ്വദിക്കാനും കഴിയും.

അല്‍ ഐന്‍, യാസ് മാള്‍, മുസഫ എന്നിവിടങ്ങളിലെ സൗകര്യങ്ങള്‍ കൂടാതെ സായിദ് പോര്‍ട്ടിലെ അബൂദബി ക്രൂയിസ് ടെര്‍മിനലിന്റെ ടെര്‍മിനല്‍ 1 ല്‍ ചെക്ക് ഇന്‍ ചെയ്യാനുള്ള സൗകര്യം നിലവിലുണ്ട്. അല്‍ ഐനിലെ ചെക്ക് ഇന്‍ കൗണ്ടര്‍ ദിവസവും രാവിലെ 10 മുതല്‍ രാത്രി 10 വരെ പ്രവര്‍ത്തിക്കും.

മുതിര്‍ന്നവര്‍ക്ക് 35 ദിര്‍ഹം (12 വയസിന് മുകളിലുള്ള യാത്രക്കാര്‍ക്ക്), കുട്ടികള്‍ക്ക് 25 ദിര്‍ഹം (12 വയസും അതില്‍ താഴെയും പ്രായമുള്ള കുട്ടികള്‍), ഇന്‍ഫന്റിന് 15 ദിര്‍ഹം എന്നിങ്ങനെയാണ് ചെക്ക് ഇന്‍ നിരക്കുകള്‍.