തെല്‍ അവീവ്: ഇസ്‌റാഈലിനെ ഞെട്ടിച്ച് തലസ്ഥാനമായ തെല്‍ അവീവില്‍ വീണ്ടും ഹൂതികളുടെ ആക്രമണം. വെള്ളിയാഴ്ച രാവിലെ നടത്തിയ ആക്രമണത്തില്‍ ഒരാള്‍ കൊല്ലപ്പെട്ടു.  പത്ത് പേര്‍ക്ക് പരിക്കേറ്റതായും ഇസ്‌റാഈല്‍ മാധ്യമങ്ങള്‍ സ്ഥിരീകരിക്കുന്നു.

യെമനില്‍ നിന്നുള്ള ഹൂതി വിഭാഗം ആക്രമണത്തിന്റെ ഉത്തരവാദിത്തം ഏറ്റെടുത്തിട്ടുണ്ട്. ആക്രമണത്തിനുപയോഗിച്ച ഡ്രോണ്‍ ബോംബിന്റെ വിവരങ്ങളുള്‍പ്പെട ഹൂതികള്‍ പുറത്തുവിട്ടു. 

അധിനിവേശ ഫലസ്തീനിലെ തെല്‍ അവീവ് ലക്ഷ്യമിട്ട് ആക്രമണം നടത്തി- സോഷ്യല്‍ മീഡിയ പോസ്റ്റ് വഴി ഹൂതികള്‍ അറിയിച്ചു. ഇന്റര്‍സെപ്റ്റര്‍ സിസ്റ്റങ്ങളെ മറികടക്കാന്‍ കഴിവുള്ളതും റഡാറുകള്‍ക്ക് കണ്ടെത്താനാകാത്തതുമായ പുതിയ തരം ഡ്രോണുകളാണ് ഉപയോഗിച്ചതെന്നും ഹൂതി വക്താവ് പോസ്റ്റില്‍ വ്യക്തമാക്കുന്നു. 

തെല്‍ അവീവിനു നേരെ നടത്തിയ വ്യോമാക്രമണം ഇസ്‌റാലിനെതിരായ തങ്ങളുടെ സൈനിക നീക്കത്തിന്റെ അടുത്ത ഘട്ടത്തിന്റെ തുടക്കമാണെന്നും ഹൂതികള്‍ മുന്നറിയിപ്പു നല്‍കി. ഇസ്‌റാഈല്‍ എല്ലാ നഗരങ്ങളിലും കരുതിയിരിക്കേണ്ടി വരുമെന്നും ഗസ്സയ്ക്കു മേലുള്ള അധിനിവേശം തുടരുന്ന കാലത്തോളം ശത്രുവിനെതിരെ ആക്രമണം ശക്തമാക്കുമെന്നും ഹൂതികളുടെ പൊളിറ്റിക്കല്‍ ബ്യൂറോ വക്താവ് ഹസാം അല്‍ അസദ് പറഞ്ഞു.

مشاهد جديدة من مكان وقوع الانفجار وسط تل أبيب#الجزيرة #فيديو pic.twitter.com/GM5BQf3TIS

— الجزيرة فلسطين (@AJA_Palestine) July 19, 2024

 
'ശത്രുവിനെതിരായ നീക്കങ്ങളില്‍ പുതിയ നയതന്ത്ര ഘട്ടത്തിലേക്കു പ്രവേശിച്ചിരിക്കുകയാണ് ഞങ്ങള്‍. ലബനാന്‍, ഇറാഖ്, ഫലസ്തീന്‍ രാജ്യങ്ങളിലെ പ്രതിരോധ മുന്നണികള്‍ തമ്മില്‍ പരസ്പര സഹകരണമുണ്ട്.' ഹസാം കൂട്ടിച്ചേര്‍ത്തു.

ആക്രമണത്തിന് പിന്നാലെ അന്വേഷണത്തിന് നെതന്യാഹു ഉത്തരവിട്ടു. അതേസമയം നെതന്യാഹുവിനെതിരായ പ്രതിഷേധം വീണ്ടും ശക്തമായിരിക്കുകയാണ്. ഇസ്‌റാഈലികള്‍ക്ക് സുരക്ഷയൊരുക്കുന്നതില്‍ നെതന്യാഹു പരാജയപ്പെട്ടെന്ന് ആരോപിച്ച് പ്രതിപക്ഷവും രംഗത്തെത്തി.