തിരുവനന്തപുരം: മേപ്പാടി ദുരന്ത മേഖല സന്ദര്‍ശിക്കുന്നതില്‍ നിന്ന് ശാസ്ത്രജ്ഞര്‍ക്ക് വിലക്കേര്‍പ്പെടുത്തിയ വിവാദ ഉത്തരവ് തിരുത്തി സര്‍ക്കാര്‍. ശാസ്ത്രജ്ഞരും സാങ്കേതിക വിദഗ്ദരും മേപ്പാടി പഞ്ചായത്ത് സന്ദര്‍ശിക്കുന്നതും, മാധ്യമങ്ങളോട് സംസാരിക്കുന്നതിനും വിലക്കേര്‍പ്പെടുത്തിയ ഉത്തരവാണ് പിന്‍വലിച്ചത്. ഇത് സംബന്ധിച്ച് നിര്‍ദേശം നല്‍കാന്‍ സംസ്ഥാന ചീഫ് സെക്രട്ടറിക്ക് മുഖ്യമന്ത്രി പിണറായി വിജയന്‍ ഉത്തരവ് നല്‍കി. ശാസ്ത്രജ്ഞരെ തടയുന്നത് സര്‍ക്കാര്‍ നയമല്ലെന്നും മുഖ്യമന്ത്രി പറഞ്ഞു. 

മേപ്പാടി പഞ്ചായത്ത് ദുരന്തമേഖലയായി പ്രഖ്യാപിച്ചിരിക്കുന്ന സാഹചര്യത്തില്‍ അവിടം സന്ദര്‍ശിക്കരുതെന്നായിരുന്നു സംസ്ഥാന ദുരന്തനിവാരണ അതോറിറ്റി നേരത്തെ പുറപ്പെടുവിച്ച ഉത്തരവില്‍ പറഞ്ഞിരുന്നത്. ഇതിന് പിന്നാലെയാണ് തിരുത്തുമായി സര്‍ക്കാര്‍ രംഗത്തെത്തിയത്. സംസ്ഥാന ദുരന്ത നിവാരണ അതോറിറ്റി നിര്‍ദ്ദേശം നല്‍കിയെന്ന വാര്‍ത്ത തെറ്റിദ്ധാരണ സൃഷ്ടിക്കുന്നുവെന്നും അങ്ങനെ തോന്നിപ്പിക്കുന്ന തരത്തില്‍ നല്‍കിയ നിര്‍ദേശം പിന്‍വലിക്കാന്‍ ആവശ്യപ്പെട്ടതായും  മുഖ്യമന്ത്രി പിണറായി വിജയന്‍ വ്യക്തമാക്കി.  

ദുരന്ത നിവാരണ പ്രിന്‍സിപ്പല്‍ സെക്രട്ടറിയാണ് വിചിത്ര സര്‍ക്കുലര്‍ പുറത്തിറക്കിയത്. പിന്നാലെ വ്യാപക വിമര്‍ശനവും ഉയര്‍ന്നിരുന്നു. അത്തരമൊരു നിലപാട് സര്‍ക്കാരിനില്ലെന്നും, അങ്ങനെ തോന്നിപ്പിക്കും വിധം ആശയവിനിമയം നടത്തിയത് ബന്ധപ്പെട്ട ഉദ്യോഗസ്ഥര്‍ ഉടനെ പിന്‍വലിക്കാന്‍ ഇടപെടണമെന്ന് ചീഫ് സെക്രട്ടറിയോട് നിര്‍ദേശിച്ചിട്ടുണ്ട്. 

 Chief Minister pinarayi vijayan  instructed the Chief Secretary to withdraw controversial order