കൊച്ചി: യു.ഡി.എഫിലെ എല്ലാ എം.എല്‍.എമാരും ഒരുമാസത്തെ ശമ്പളം മുഖ്യമന്ത്രിയുടെ ദുരിതാശ്വാസനിധിയിലേക്ക് സംഭാവന ചെയ്യുമെന്ന് പ്രതിപക്ഷ നേതാവ് വി.ഡി.സതീശന്‍. ദുരന്തത്തിന് ഇരയായ വയനാട്ടിലെ ജനങ്ങളുടെ പ്രശ്‌നങ്ങള്‍ പരിഹരിക്കാനുള്ള എല്ലാ കാര്യങ്ങളിലും യുഡിഎഫ് പങ്കാളികളാകുമെന്നും അദ്ദേഹം അറിയിച്ചു. കൊച്ചിയില്‍ മാധ്യമങ്ങളോട് പ്രതികരിക്കുകയായിരുന്നു സതീശന്‍.

'മുസ്‌ലിംലീഗ് വലിയ പുനരധിവാസ പദ്ധതി പ്രഖ്യാപിച്ചിട്ടുണ്ട്. യുഡിഎഫിലെ എല്ലാ ഘടകക്ഷികളും പുനരധിവാസ ശ്രമങ്ങളില്‍ പങ്കാളികളാകും. എല്ലാ കുടുംബങ്ങളേയും ജീവിതത്തിലേക്ക് തിരിച്ചുകൊണ്ടുവരാന്‍ ഇപ്പോള്‍ പ്രഖ്യാപിച്ചതിനു പുറമെയുള്ള സഹായങ്ങള്‍ കൂടി യുഡിഎഫിന്റെ ഭാ?ഗത്തുനിന്ന് ഉണ്ടാകും. വയനാട് പുനരധിവാസവുമായി പൂര്‍ണമായി സഹകരിക്കും', അദ്ദേഹം വ്യക്തമാക്കി.

സമാന അപകടങ്ങള്‍ ഇല്ലാതാക്കാന്‍ എന്തുചെയ്യണമെന്ന് ?ഗൗരവമായി ആലോചിക്കണമെന്നും സതീശന്‍ ആവശ്യപ്പെട്ടു. ഈ ആവശ്യം ഉന്നയിച്ച് 2021-ല്‍ ഐ.എസ്.ആര്‍.ഒയുടെ ഉള്‍പ്പെടെ രാജ്യാന്തര പഠന റിപ്പോര്‍ട്ടുകള്‍ നിയമസഭയില്‍ അടിയന്തര പ്രമേയമായി പ്രതിപക്ഷം കൊണ്ടുവന്നിരുന്നു. മണ്ണിടിച്ചിലിന് സാധ്യതയുള്ള എല്ലാ സ്ഥലങ്ങളും മാപ്പുചെയ്യണം. വിവിധ വകുപ്പുകളെ ഏകോപിപ്പിക്കണം. മണ്ണ് പരിശോധിക്കണം. കുസാറ്റിലെ കാലാവസ്ഥ വകുപ്പ് രാജ്യാന്തര നിലവാരമുള്ളതാണ്. അവരേകൂടി ലിങ്ക് ചെയ്യിക്കണം. ആര്‍ട്ടിഫിഷ്യല്‍ ഇന്റലിജന്‍സിന്റെ സഹായത്തോടെ മണ്ണിടിച്ചില്‍ ഉള്‍പ്പടെയുള്ളവയ്ക്ക് സാധ്യതയുണ്ടെന്ന മുന്നറിയിപ്പ് ലഭിക്കാനുള്ള സംവിധാനം ഉണ്ടാകണമെന്നും പുനരധിവാസത്തിനൊപ്പം ഇതിനെല്ലാമുള്ള ശ്രമവും വേണമെന്ന് വി.ഡി.സതീശന്‍ ആവശ്യപ്പെട്ടു.