വയനാട്: മുണ്ടക്കൈ ഉരുള്‍പൊട്ടല്‍ ദുരന്തത്തില്‍ കാണാതായവര്‍ക്കായി ചാലിയാറില്‍ വിവിധയിടങ്ങളിലായി ഇന്നും ജനകീയ തിരച്ചില്‍. രാവിലെ ഏഴുമണി മുതല്‍ മുണ്ടേരി ഫാം മേഖലയില്‍ തുടങ്ങുന്ന വിശദമായ തിരച്ചില്‍ ഉച്ചയ്ക്കു രണ്ടുമണിയോടെ പരപ്പന്‍പാറയില്‍ അവസാനിക്കും.

എന്‍.ഡി.ആര്‍.എഫ്, അഗ്‌നിരക്ഷാ സേന, സിവില്‍ ഡിഫന്‍സ് സേന, പൊലിസ്, വനംവകുപ്പ് എന്നീ സേനകള്‍ അടങ്ങുന്ന 60 അംഗ സംഘമായിരിക്കും ഇവിടെ അഞ്ചുകിലോമീറ്റര്‍ ദൂരം തെരച്ചില്‍ നടത്തുക. വൈദഗ്ധ്യം ആവശ്യമായതിനാല്‍ ഈ ഭാഗത്തെ തിരച്ചിലിലിന് സന്നദ്ധപ്രവര്‍ത്തകരുണ്ടാകില്ല. വനമേഖലയായ പാണന്‍കായത്തില്‍ 50 അംഗ സംഘവും ഇരുട്ടുകുത്തി മുതല്‍ കുമ്പളപ്പാറ വരെ 40 അംഗ സംഘവും പാണന്‍കായ മുതല്‍ പൂക്കോട്ടുമനവരെ 30 അംഗ സംഘവും പൂക്കോട്ടുമന മുതല്‍ ചാലിയാര്‍ മുക്കുവരെ മറ്റൊരു 30 അംഗ സംഘവും തെരച്ചില്‍ നടത്തും.

അഞ്ചിടങ്ങളിലായി നടത്തുന്ന തിരച്ചില്‍ നാളെയും തുടരും. ഇന്നലെ മുണ്ടക്കൈ ചൂരല്‍മല മേഖലകളില്‍ നടന്ന ജനകീയ തെരച്ചലില്‍ സന്നദ്ധപ്രവര്‍ത്തകരും പ്രദേശവാസികളും ക്യാമ്പില്‍ കഴിയുന്നവരും ജനപ്രതിനിധികളും അടക്കം രണ്ടായിരം പേരാണ് പങ്കെടുത്തത്.

അതോടൊപ്പം തിരിച്ചറിയാത്ത മൃതദേഹങ്ങളുടേയും ശരീരഭാഗങ്ങളുടേയും ഡി.എന്‍.ഫലം ഇന്ന് മുതല്‍ പരസ്യപ്പെടുത്തി തുടങ്ങും. ഇതോടെ മരിച്ച ശേഷിക്കുന്നവരെ കൂടി കണ്ടെത്താനാകുമെന്നാണ് പ്രതീക്ഷ. കൂടാതെ ദുരന്തത്തില്‍ നഷ്ടമായ രേഖകള്‍ നല്‍കുന്നതുമായി ബന്ധപ്പെട്ട് ഇന്ന് പ്രത്യേക ക്യാംപ് നടത്തുന്നുണ്ട്. മേപ്പാടി ഗവ. ഹൈസ്‌കൂള്‍, സെന്റ് ജോസഫ് യു പി സ്‌കൂള്‍, മൗണ്ട് താബോര്‍ ഹൈസ്‌കൂള്‍ എന്നിവിടങ്ങളിലാണ് ക്യാംപ്. വിവിധ വകുപ്പുകള്‍, ഐടി മിഷന്‍, അക്ഷയ എന്നിവയെ ഏകോപിപ്പിച്ചാണ് ക്യാംപ് സംഘടിപ്പിക്കുന്നത്.

Search operations for missing individuals in the Wayanad Mudakkai landslide disaster continue with specialized teams working in Chaliyar without volunteers