പാരിസ്: ഇന്ത്യന്‍ ഗുസ്തി താരം വിനേഷ് ഫോഗട്ടിന് പിന്തുണയുമായി ലോക ഗുസ്തി അസോസിയേഷന്‍ മേധാവി. ലോക റസ്‌ലിംങ് പ്രസിഡന്റ് നെനാദ് ലാലോവിച്ചാണ് ഫോഗട്ടിന്റെ കാര്യത്തില്‍ പ്രതികരണവുമായി രംഗത്തെത്തിയത്.
ദേശീയ മാധ്യമത്തിന് നല്‍കിയ അഭിമുഖത്തിലാണ് യു.ഡബ്യൂ.ഡബ്യൂ പ്രസിഡന്റ് നിലപാട് വ്യക്തമാക്കിയത്. ഇന്ത്യ രാജ്യത്തിന്റെ വലിപ്പമല്ല ഇവിടെ പരിഗണിക്കുന്നത്. അത്‌ലറ്റുകള്‍ അത്‌ലറ്റുകളാണെന്ന് ലാലോവിച്ച് പറഞ്ഞു. എന്നാല്‍ സംഭവിച്ച കാര്യത്തില്‍ വിഷമമുണ്ടെന്നും അദ്ദേഹം കൂട്ടിച്ചേര്‍ത്തു. 

എല്ലാവരും അറിഞ്ഞാണ് വിനേഷിന്റെ ഭാരം രേഖപ്പെടുത്തിയത്. എന്താണ് സംഭവിച്ചതെന്ന് എല്ലാവരും കണ്ടതാണ്. നിയമം പിന്തുടരുക മാത്രമാണ് നമുക്ക് മുന്നിലുള്ള വഴി. അത്‌ലറ്റുകളുടെ ആരോഗ്യത്തിന് വേണ്ടിയാണ് നിയമങ്ങള്‍. അത് പാലിക്കാന്‍ താരങ്ങള്‍ ബാധ്യസ്ഥരാണ്. നിയമങ്ങളില്‍ ചെറിയ മാറ്റങ്ങള്‍ വരുത്താന്‍ കഴിയും. എന്നാല്‍ നിയമങ്ങള്‍ പൂര്‍ണമായും മാറ്റാന്‍ കഴിയില്ലെന്ന് ലാലോവിച്ച് വ്യക്തമാക്കി.പാരിസ് ഒളിംപിക്‌സില്‍ വനിതകളുടെ 50 കിലോ ഗ്രാം ഫ്രീ സ്‌റ്റൈല്‍ വിഭാഗത്തില്‍ ഫൈനലിലെത്തിയതിന് ശേഷമായിരുന്നു 100 ഗ്രാം തൂക്കം അധികമായതിന്റെ പേരില്‍ വിനേഷ് ഫോഗട്ടിനെ അയോഗ്യയാക്കിയത്.