ഷിരൂർ: കർണാടകയിലെ ഷിരൂരിൽ മണ്ണിടിച്ചിലിനെ തുടർന്ന് കാണാതായ മലയാളി ലോറി ഡ്രൈവർ അർജുൻ ഉൾപ്പെടെയുള്ളവർക്കായി ഗംഗാവലി പുഴയിൽ പരിശോധന ഇന്ന് തുടങ്ങും. നാവികസേനയുടെ നേതൃത്വത്തിലായിരിക്കും തിരച്ചിൽ നടത്തുക. രാവിലെ ഒൻപതോടെ കാർവാറിൽ നിന്നുള്ള നാവികസേന യൂണിറ്റ് ഷിരൂരിൽ എത്തും. 

ഗംഗാവാലി പുഴയിൽ അടിയൊഴുക്ക് കുറഞ്ഞതിനെ തുടർന്നാണ് വീണ്ടും പരിശോധന തുടങ്ങുന്നത്. ലോറി ഉള്ളതായി കരുതുന്ന, നേരത്തെ മാർക്ക് ചെയ്ത രണ്ട് സ്ഥലങ്ങൾ കേന്ദ്രീകരിച്ചാകും പരിശോധന. ലോറിയുടെ സ്ഥാനം കൃത്യമായി കണ്ടെത്താൻ ഇന്ന് സോണാർ പരിശോധന നടത്തും. ഗംഗാവലി പുഴയുടെ ഒഴുക്കിൻ്റെ വേഗത അറിയാനുള്ള പരിശോധനയും തിരച്ചിലിന് മുൻപ് നടത്തും. ഇത് കണ്ടെത്തിയതിന് ശേഷം നാവിക സേനയുടെ മുങ്ങൽ വിദഗ്ധർ പുഴയിൽ മുങ്ങിയുള്ള പരിശോധന നടത്തണോ എന്നുള്ള കാര്യത്തിൽ തീരുമാനം എടുക്കും.

അർജുനെ കണ്ടെത്താനായി പതിനഞ്ച് ദിവസത്തോളം നടത്തിയ തിരച്ചിൽ പ്രതികൂല കാലാവസ്ഥയെ തുടർന്ന് പിന്നീട് നിർത്തിവെക്കുകയായിരുന്നു. പിന്നീട് ഏറെ നാളത്തെ അനിശ്ചിതത്വങ്ങൾക്കുശേഷമാണ് ഇന്ന് വീണ്ടും പുനരാരംഭിക്കുന്നത്. ഇന്നലെ വൈകീട്ട് നടന്ന ഉന്നതതല യോഗത്തിലാണ് തിരച്ചിൽ പുനരാരംഭിക്കാൻ തീരുമാനിച്ചത്. കാർവാറിൽ നടത്തിയ ഉന്നതതല യോഗത്തിൽ ഉത്തര കന്ന‍ഡ ജില്ലാ കളക്ടർ, കാർവാർ എംഎൽഎ ഉൾപ്പെടെയുള്ളവർ പങ്കെടുത്തു.

ഇതിനിടെ, ദൗത്യം പുനരാരംഭിക്കാൻ വൈകുന്നതിൽ അർജുൻറെ കുടുംബം ഉത്തര കന്നഡ ജില്ലാ ഭരണകൂടത്തിനെതിരെ വിമർശനവുമായി രംഗത്തെത്തിയിരുന്നു. തിരച്ചിൽ ആരംഭിച്ചില്ലെങ്കിൽ ഷിരൂരിൽ കുടുംബം ഒന്നടങ്കം പ്രതിഷേധിക്കുമെന്നാണ് അർജുൻറെ സഹോദരിയുടെ ഭർത്താവ് ജിതിൻ നേരത്തെ പ്രതികരിച്ചത്. 

A search operation will begin today in the Ganga Valley river for missing Malayali lorry driver Arjun and others after a landslide in Shiruru, Karnataka. The search will be led by the Navy