തെരഞ്ഞെടുപ്പ് ഫലം പുറത്തുവന്നത് മുതല്‍ ഇന്ത്യയില്‍ ന്യൂപക്ഷ മതവിഭാഗങ്ങള്‍ക്ക് നേരെ അക്രമസംഭവങ്ങള്‍ തുടരുകയാണെന്നും ഇന്നലെ ഇറക്കിയ 'ഇന്ത്യ: വിദ്വേഷ പ്രസംഗം മോദിയുടെ തിരഞ്ഞെടുപ്പ് പ്രചാരണത്തിന് ആക്കം കൂട്ടി' എന്ന തലക്കെട്ടിലുള്ള റിപ്പോര്‍ട്ടില്‍ എച്ച്.ആര്‍.ഡബ്ല്യു ചൂണ്ടിക്കാട്ടി. തെരഞ്ഞെടുപ്പ് ചട്ടപ്രകാരം ഇത്തരം പ്രസംഗങ്ങള്‍ നിയമവിരുദ്ധമാണെങ്കിലും, തെരഞ്ഞെടുപ്പ് വിജയത്തിനായി പ്രധാനമന്ത്രിയുടെ പ്രസംഗത്തില്‍ വര്‍ഗീയ സ്വഭാവമുള്ള പരാമര്‍ശങ്ങള്‍ ധാരാളം കടന്നുകൂടി. പ്രധാനമന്ത്രി മാത്രമല്ല അദ്ദേഹത്തിന്റെ പാര്‍ട്ടിയായ ബി.ജെ.പിയുടെ മറ്റ് നേതാക്കളും ന്യൂനപക്ഷവിഭാഗങ്ങളെ ലക്ഷ്യംവച്ചു. ബി.ജെ.പി നേതാക്കള്‍ പാര്‍ശ്വവല്‍ക്കരിക്കപ്പെട്ട വിഭാഗങ്ങള്‍ക്കെതിരേ വിവേചനവും ശത്രുതയും അക്രമവും ഇളക്കിവിടുന്ന പ്രസ്താവനകള്‍ ആവര്‍ത്തിച്ചു.

കൂടാതെ ബി.ജെ.പി ഭരിക്കുന്ന ഇന്ത്യന്‍ സംസ്ഥാനങ്ങളില്‍ മുസ്‍ലിംകളുടെ വീടുകളും വ്യാപാരസ്ഥാപനങ്ങളും ആരാധനാലയങ്ങളും മതിയായ നടപടിക്രമങ്ങള്‍ പാലിക്കാതെ വ്യാപകമായി പൊളിച്ചുനീക്കുകയോ തകര്‍ക്കുകയോചെയ്തു. റിപ്പോര്‍ട്ടില്‍ മോദി നടത്തിയ നിരവധി വിദ്വേഷ പ്രസംഗങ്ങള്‍ ഉദാഹരിക്കുകയും ചെയ്യുന്നുണ്ട്. രാജസ്ഥാനില്‍ നടത്തിയ പ്രസംഗത്തില്‍ മുസ്‍ലിംകളെ നുഴഞ്ഞുകയറ്റക്കാരും കൂടുതല്‍ കുട്ടികളെ ഉത്പാദിപ്പിക്കുന്നവരായി ആക്ഷേപിക്കുകയും ചെയ്തതാണ് ഒരു ഉദാഹരണം. പ്രതിപക്ഷം അധികാരത്തിലേറിയാല്‍ ഹിന്ദു സ്ത്രീകളുടെയും പെണ്‍കുട്ടികളുടെയും സുരക്ഷയ്ക്ക് ഭീഷണിയാണെന്ന വിധത്തിലും മോദി പ്രസംഗിച്ചു. കോണ്‍ഗ്രസ് ജയിച്ചാല്‍ ക്രിക്കറ്റ് ടീമില്‍ മുസ്‍ലിംകള്‍ മാത്രമാണ് ഉണ്ടാകുക, ഇന്ത്യയിലെ അവശജനവിഭാഗങ്ങളിലൊന്നായ പട്ടികവിഭാഗങ്ങളുടെ തൊഴില്‍ സംവരണവും മറ്റ് അവകാശങ്ങളും എടുത്ത് മുസ്‍ലിംകള്‍ക്ക് നല്‍കും, ഹിന്ദു സ്ത്രീകളുടെ താലിമാല പ്രതിപക്ഷം എടുക്കും തുടങ്ങിയ തെറ്റിദ്ധാരണാജനകവും വിദ്വേഷവും നിറഞ്ഞ പ്രസംഗങ്ങളും നടത്തുകയുണ്ടായി. അമിത്ഷാ, യോഗി ആദിത്യനാഥ്, ഹിമന്തബിശ്വ ശര്‍മ, അനുരാഗ് താക്കൂര്‍ തുടങ്ങിടയ ബി.ജെ.പി നേതാക്കളുടെ പ്രസംഗങ്ങളും റിപ്പോര്‍ട്ടിലുണ്ട്.

പ്രധാനമന്ത്രിയും ബി.ജെ.പി നേതാക്കളും മുസ്‍ലിംകള്‍ക്കും മറ്റ് ന്യൂനപക്ഷ വിഭാഗങ്ങള്‍ക്കുമെതിരായ പ്രസംഗങ്ങളില്‍ തീര്‍ത്തും തെറ്റായ അവകാശവാദങ്ങള്‍ ഉന്നയിച്ചെന്ന് ഹ്യൂമന്‍ റൈറ്റ്‌സ് വാച്ച് ഏഷ്യ ഡയറക്ടര്‍ എലെയ്ന്‍ പിയേഴ്‌സണ്‍ പറഞ്ഞു. ന്യൂനപക്ഷങ്ങള്‍ക്ക് നേര്‍ക്കുള്ള തുടര്‍ച്ചയായ പ്രകോപനപരമായ പ്രസംഗങ്ങളും അക്രമസംഭവങ്ങളും മോദിയുടെ ഭരണത്തിന് കീഴില്‍ സാധാരണ സംഭവമായി മാറിയെന്നും അദ്ദേഹം അഭിപ്രായപ്പെട്ടു.

 Human Rights Watch reports that 110 out of 173 speeches made by PM Narendra Modi during the Lok Sabha election campaign contained Islamophobic content, sparking controversy and debate.