ദുബൈ: ശരത്കാലത്തിന്റെ വരവറിയിച്ചു  യു.എ.ഇയുടേയും അറേബ്യൻ ഉപഭൂഖണ്ഡത്തിന്റേയും ആകാശത്ത് സൂഹൈൽ നക്ഷത്രത്തിന്റെ ഉദയം ഉടൻ ദൃശ്യമാവുമെന്ന് എമിറേറ്റ്സ് ആസ്ട്രോണമി സൊസൈറ്റി അറിയിച്ചു. ഇത് നിലവിലെ തീവ്രമായ ചൂട് അവസാനിക്കുന്നതിന്റ സൂചനയാണ്. തുടർന്നുള്ള ദിവസങ്ങളിൽ അന്തരീക്ഷോഷ്മാവ് ക്രമാതീതമായി കുറയുകയും ചെയ്യും. ഇതിന്‌ പുറമെ, ഈ കാലയളവിൽ അന്തരീക്ഷത്തിലെയും ഭൂമിയിലെയും ഈർപ്പ സാന്നിധ്യം വർധിക്കും.

സുഹൈൽ നക്ഷത്രം പ്രത്യക്ഷപ്പെട്ടത് മുതൽ നിലവിലുള്ള ദൈർഘ്യമേറിയ പകലുകൾ കുറഞ്ഞു വരും. ഏകദേശം 45 ദിവസങ്ങൾക്ക് ശേഷം, അതായത് ഒക്ടോബർ 2-ഓട് കൂടി രാപ്പകലുകളുടെ ദൈർഘ്യം തുല്യമായി വരികയും അത് സുഖമുള്ള അന്തരീക്ഷ ഉഷ്മാവിന് കാരണമാവുകയും ചെയ്യും. 100 ദിവസത്തിനകം ഗൾഫിൽ ശൈത്യവും ശീതകാലവും വന്നെത്തും.

നക്ഷത്രങ്ങളുടെ ഉദയവും അവയുടെ സ്ഥാനങ്ങലും പ്രാചീനകാലം മുതൽ അറേബ്യൻ ഉപഭൂഖണ്ഡത്തിലെ ജനങ്ങളുടെ ദൈനംദിന ജീവിതവുമായി ബന്ധപ്പെട്ടതാണ്. അവയെ ആശ്രയിച്ചാണ് കാലാവസ്ഥാ മാറ്റങ്ങൾ, മഴക്കാലം, ചൂട്, തണുപ്പ് തുടങ്ങിയവയുടെ ആരംഭം അവർ അറിയുന്നതും, മരുഭൂമിയിലൂടെയോടെ സമുദ്രത്തിലൂടെയോ ഉള്ള യാത്രകളിൽ ദിശ മനസ്സിലാക്കുന്നതും. ഗൾഫ് മേഖലയിലെ നാട്ടുകാരുടെ ജീവിതത്തിൽ പ്രാധാന്യമർഹിക്കുന്ന 'അൽ-ദറൂർ' എന്ന പ്രാദേശിക കലണ്ടർ ആരംഭിക്കുന്നതും സൂഹൈൽ നക്ഷത്രത്തിന്റെ ഉദയത്തോടെയാണ്. പുരാതന കാലം മുതൽ കാലാവസ്ഥ, കൃഷി, വിളവെടുപ്പ്, മത്സ്യബന്ധനം തുടങ്ങിയ വിവിധ മേഖലകളിൽ പ്രാധാന്യമർഹിക്കുന്നതാണ് ഈ പ്രാദേശിക കലണ്ടർ. വർഷത്തെ നാല് ഭാഗങ്ങളാക്കി വിഭജിക്കുന്ന ഈ കലണ്ടർ, ഓരോ ഭാഗവും നൂറ് ദിവസങ്ങളിലായി വിഭജിച്ചിരിക്കുന്നു. ഇതിൽ, 'മിയത്ത് അൽസഫരി'എന്നത് ശരത്കാലത്തെ സൂചിപ്പിക്കുന്നു, 'മിയത്ത് അൽഷിതാ' ശീതകാലം, 'മിയത്ത് അൽസൈഫ്' വസന്തകാലം, 'അൽ-ഖൈദ്' കടുത്ത ചൂടിന്റെ കാലം എന്നിവയാണ്. അവസാന ഭാഗമായ "അൽ-ഖൈദ്" 65 ദിവസങ്ങൾ നീണ്ടുനിൽക്കുന്നതാണ്. ഇതിൽ ഓരോ പത്ത് ദിവസവും "ദർ" എന്ന പേരിലാണ് അറിയപ്പെടുന്നത്.