അന്ത്യോദയ എക്‌സ്പ്രസിന് (ഹൗറ-എറണാകുളം) ആലുവയില്‍ സ്റ്റോപ്പ് അനുവദിച്ചതിന്റെയും, പാലരുവി എക്‌സ്പ്രസ് തൂത്തുക്കുടി വരെ നീട്ടുന്നതിന്റെയും ഉദ്ഘാടനം കേന്ദ്രമന്ത്രി സുരേഷ് ഗോപി നിര്‍വഹിച്ചു. വൈകിട്ട് പാലക്കാട് ജംഗ്ഷന്‍ റെയില്‍വേ സ്റ്റേഷനിലെത്തിയാണ് മന്ത്രി ഫ്‌ലാഗ് ഓഫ് കര്‍മം നിര്‍വഹിച്ചത്.

പാലക്കാട്-തിരുനെല്‍വേലി റൂട്ടിലോടുന്ന പാലരുവി എക്‌സ്പ്രസാണ് ജനങ്ങളുടെ ഏറെ നാളായുള്ള ആവശ്യപ്രകാരം തിരുനെല്‍വേലിയില്‍ നിന്ന് 60 കി.മീ ദൂരെ സ്ഥിതിചെയ്യുന്ന തൂത്തുക്കുടിയിലേക്ക് നീട്ടിയത്.

വൈകിട്ട് 4.05ന് പാലക്കാട് നിന്ന് പുറപ്പെട്ട് പിറ്റേന്ന് രാവിലെയാണ് പാലരുവി എക്‌സ്പ്രസ് തൂത്തുക്കുടിയില്‍ എത്തുക. രാവിലെ 4.35ന് തിരുനെല്‍വേലിയിലും 6.40ന് തൂത്തുക്കുടിയിലുമെത്തും. കൂടാതെ പാലരുവി എക്‌സ്പ്രസിന് മൂന്ന് ജനറല്‍ കംപാര്‍ട്‌മെന്റും ഒരു സ്ലീപ്പറുമുള്‍പ്പെടെ നാല് അധിക കോച്ചുകളും അനുവദിച്ചിരുന്നു.

അതേസമയം മുണ്ടക്കൈ ഉരുള്‍പൊട്ടല്‍ ദുരന്തത്തിലെ കേന്ദ്രസഹായത്തെക്കുറിച്ച് ചോദിച്ചപ്പോള്‍, കേരളത്തോട് നല്‍കാന്‍ ആവശ്യപ്പെട്ട വിവരങ്ങള്‍ കൈമാറിയോ എന്ന് അന്വേഷിക്കുവെന്നായിരുന്നു മന്ത്രിയുടെ മറുപടി.