കോഴിക്കോട്: ഹേമ കമ്മിറ്റി റിപ്പോര്‍ട്ട് ചര്‍ച്ച ചെയ്യുന്നതില്‍ തനിക്ക് യാതൊരു താല്‍പര്യവുമില്ലെന്ന് നടിയും കമ്മിറ്റി അംഗവുമായ ശാരദ. 

ഒരു ജോലിയുമില്ലാത്തവരാണ് റിപ്പോര്‍ട്ട് ചര്‍ച്ച ചെയ്യുന്നത്. ചര്‍ച്ച ചെയ്യുന്നതിലൂടെ ജോലി ഇല്ലാത്തവര്‍ക്ക് ഒരു ജോലി ആവും. ഇപ്പോള്‍ കൂടുതല്‍ ശ്രദ്ധ നല്‍കേണ്ടത് വയനാട് ദുരന്തത്തില്‍ ആണ്. താന്‍ സിനിമ വിട്ടിട്ട് 15 വര്‍ഷമായെന്നും ഇപ്പോള്‍ നടക്കുന്ന കാര്യങ്ങള്‍ ഒന്നും അറിയില്ലെന്നും ശാരദ പ്രതികരിച്ചു. 

അഞ്ചാറ് വര്‍ഷം മുമ്പ് നടന്ന തെളിവെടുപ്പിനെക്കുറിച്ചും റിപ്പോര്‍ട്ടില്‍ താന്‍ എഴുതിയ കാര്യങ്ങളെ കുറിച്ചു ഓര്‍മയില്ലെന്നാണ് ശാരദ പറയുന്നത്. 79 വയസ്സായി. ഓര്‍മശക്തി കുറവാണ്. റിപ്പോര്‍ട്ടിനെ കുറിച്ച് എല്ലാം ജസ്റ്റിസ് ഹേമ പറയട്ടെ- അവര്‍ പറഞ്ഞു. റിപ്പോര്‍ട്ടിനെ കുറിച്ചോ നടിമാരുടെ വെളിപെടുത്തലുകളെ കുറിച്ചോ പ്രതികരിക്കാന്‍ അവര്‍ തയ്യാറായില്ല.  

നടി അക്രമിക്കപ്പെട്ട സംഭവത്തെ തുടര്‍ന്ന് മലയാള സിനിമയിലെ സ്ത്രീകളുടെ സംഘടനയായ വിമെന്‍ ഇന്‍ സിനിമാ കളക്ടീവിന്റെ (ഡബ്ല്യുസിസി) ആവശ്യം പരിഗണിച്ചാണ് 2017 നവംബര്‍ 16 ന് സര്‍ക്കാര്‍ ജസ്റ്റിസ് ഹേമ അധ്യക്ഷയായി കമ്മിറ്റി രൂപീകരിച്ചത്.