കൊണ്ടോട്ടി: ഹജ്ജ് 2025 ഓൺലൈൻ അപേക്ഷാ സമർപ്പണത്തിനുള്ള തീയതി ഈ മാസം 30 വരെ നീട്ടി കേന്ദ്ര ഹജ്ജ് കമ്മിറ്റി. ഇന്നലെ വരെയായിരുന്നു ഹജ്ജ് അപേക്ഷ നൽകുന്നതിനുള്ള സമയ പരിധി നിശ്ചയിച്ചിരുന്നത്. എന്നാൽ അപേക്ഷകരുടെ എണ്ണം കുറഞ്ഞതിനാൽ ഒരാഴ്ച കൂടി നീട്ടുകയായിരുന്നു.

സംസ്ഥാന ഹജ്ജ് കമ്മിറ്റി മുഖേന ഇന്നലെ വരെ 18,835 അപേക്ഷകൾ ലഭിച്ചിട്ടുണ്ട്. 3768 അപേക്ഷകൾ 65 വയസ് വിഭാഗത്തിലും, 2077 അപേക്ഷകൾ ലേഡീസ് വിത്തൗട്ട് മെഹ്‌റം(പുരുഷ മെഹ്‌റമില്ലാത്തവർ) വിഭാഗത്തിലും 12,990 അപേക്ഷകൾ ജനറൽ വിഭാഗത്തിലുമാണ് ലഭിച്ചത്. ഇന്ത്യയിലൊട്ടാകെയായി ഇതുവരെ 1,32,511 അപേക്ഷകളാണ് ലഭിച്ചത്.

2025ലെ ഹജ്ജ് തീർഥാടകർക്ക് നിയന്ത്രണവുമായി സഊദി അറേബ്യ. കടുത്ത ചൂട് ഉണ്ടാകുമെന്നതിനാൽ ആരോഗ്യപ്രശ്‌നങ്ങൾ ഒഴിവാക്കുന്നതിനുള്ള മുൻകരുതലിന്റെ ഭാഗമായാണ് നടപടിയെന്ന് ഹജ്ജ്-ഉംറ മന്ത്രാലയം അറിയിച്ചു.

കഴിഞ്ഞ ഹജ്ജ് തീർഥാടനത്തിൽ കൊടും ചൂട് കാരണം 1300ലേറെ പേർ മരിച്ചിരുന്നു. കൂടാതെ താപനില 51.8 ഡിഗ്രി സെൽഷ്യസായി ഉയർന്നത് തീർഥാടകർക്ക് ആരോഗ്യപ്രശ്‌നങ്ങൾക്കും ഇടയാക്കി. 2025ലെ ഹജ്ജ് സീസണിലും കടുത്ത ചൂടാണ് അനുഭവപ്പെടുമെന്നാണ് വിലിയിരുത്തൽ.