ബെയ്റൂത്ത്: തുടർച്ചയായ മൂന്നാം ദിവസവും ലബനാനിൽ ആക്രമണം നടത്തി ഇസ്റാഈൽ. അതിനിടെ ഇസ്റാഈൽ തലസ്ഥാനമായ തെൽഅവീവിലെ മൊസാദ് ആസ്ഥാനത്തിനു നേരെയും ഹിസ്ബുല്ലയുടെ ആക്രമണ ശ്രമമുണ്ടായി. ഹിസ്ബുല്ലയെ നേരിടാൻ ലബനാനിലേക്ക് കരയാക്രമണം നടത്താൻ ഒരുങ്ങുകയാണെന്ന് ഇസ്റാഈൽ സൈന്യം അറിയിച്ചു. റിസർവിലുള്ള സൈനികരെ ഇസ്റാഈൽ തിരിച്ചുവിളിച്ചു.

വടക്കൻ ഇസ്റാഈൽ അതിർത്തിയിൽ കരസേനയുടെ പടയൊരുക്കവും ഇസ്റാഈൽ നടത്തുന്നുണ്ട്. ഇവിടെ ടാങ്കുകളും മറ്റും വിന്യസിച്ചു. എല്ലാ ദിവസവും ലബനാനിൽ ആക്രമണം നടത്തുന്നുണ്ടെന്നും നിങ്ങൾക്ക് കരയാക്രമണം നടത്താനുള്ള തയാറെടുപ്പാണിതെന്നും ഇസ്റാഈൽ സൈനിക മേധാവി ലെഫ്റ്റനന്റ് ജനറൽ ഹെർസി ഹലേവി പ്രസ്താവനയിൽ പറഞ്ഞു.

ബുധനാഴ്ച ഇസ്റാഈൽ നടത്തിയ ആക്രമണത്തിൽ 51 പേർ കൊല്ലപ്പെട്ടതായും 223 പേർക്ക് പരുക്കേറ്റതായും ലബനാൻ ആരോഗ്യ മന്ത്രി പറഞ്ഞു. ഹിസ്ബുല്ലയുടെ ശക്തികേന്ദ്രങ്ങളായ പർവത മേഖലകളിലടക്കം ആക്രമണം നടന്നു.

ഇന്നലെ രാവിലെ തെൽഅവീവിലെ മൊസാദ് ആസ്ഥാനത്തിനു നേരെ ബാലിസ്റ്റിക് മിസൈൽ ആക്രമണം നടത്തിയതായി ഹിസ്ബുല്ല പറഞ്ഞു. ഹിസ്ബുല്ലയുടെ 60 ഇന്റലിജൻസ് കേന്ദ്രങ്ങളിൽ ആക്രമണം നടത്തിയതായി ഇസ്റാഈൽ സൈന്യം പറഞ്ഞു. ബുധനാഴ്ച ഹിസ്ബുല്ലയുടെ 280 കേന്ദ്രങ്ങളിലാണ് ആക്രമണം നടന്നത്.

തിങ്കളാഴ്ച ഇസ്റാഈൽ നടത്തിയ ആക്രമണത്തിൽ 558 പേർ കൊല്ലപ്പെട്ടിരുന്നു. 1957-90 ആഭ്യന്തര യുദ്ധത്തിനു ശേഷമുള്ള ഏറ്റവും കൂടുതൽ ആൾനാശമാണ് ലബനാനിലുണ്ടായത്. തെൽഅവീവിലുണ്ടായ ആക്രമണം ആശങ്കാജനകമാണെന്ന് യു.എസ് ദേശീയ സുരക്ഷാ കൗൺസിൽ വക്താവ് ജോൺ കിർബി പറഞ്ഞു.