കല്‍പറ്റ/ ചേലക്കര: വയനാട് ലോക്‌സഭ മണ്ഡലത്തിലും ചേലക്കര നിയമസഭ മണ്ഡലത്തിലും വോട്ടെടുപ്പ് തുടങ്ങി. രാവിലെ ഏഴിന് തുടങ്ങിയ വോട്ടെടുപ്പ് വൈകീട്ട് ആറിന് അവസാനിക്കും. ബൂത്തുകളില്‍ നീണ്ട നിരയാണ് രാവിലെ മുതല്‍ കാണുന്നത്. തികഞ്ഞ പ്രതീക്ഷയിലാണ് മുന്നണികള്‍. പൊലിസ് സുരക്ഷ സംവിധാനങ്ങളും ശക്തമാക്കിയിട്ടുണ്ട്.
കന്നിയങ്കത്തിനിറങ്ങുന്ന പ്രിയങ്ക ഗാന്ധി (യു.ഡി.എഫ്)യാണ് വയനാടിന്റെ സ്റ്റാര്‍ സ്ഥാനാര്‍ഥി.  സത്യന്‍ മൊകേരി (എല്‍.ഡി.എഫ്), നവ്യ ഹരിദാസ് (എന്‍.ഡി.എ) എന്നിവരുള്‍പ്പെടെ 16 പേരാണ് മലനാട്ടില്‍ അങ്കത്തിനിറങ്ങുന്നത്.  പ്രിയങ്ക ഗാന്ധി ഉള്‍പ്പെടെ 11 പേര്‍ ഇതര സംസ്ഥാനത്തു നിന്നുള്ളവരാണ് എന്നതാണ് മറ്റൊരു കൗതുകം. വയനാട്ടില്‍ 14,71,742 വോട്ടര്‍മാരാണുള്ളത്.

ചേലക്കരയില്‍ യു.ആര്‍. പ്രദീപ് (എല്‍.ഡി.എഫ്), രമ്യ ഹരിദാസ് (യു.ഡി.എഫ്), കെ. ബാലകൃഷ്ണന്‍ (എന്‍.ഡി.എ) എന്നിവരുള്‍പ്പെടെ ആറു പേരാണ് മത്സരരംഗത്തുള്ളത്. മണ്ഡലത്തില്‍ ആകെ 2.13 ലക്ഷം വോട്ടര്‍മാരാണുള്ളത്. ഇതില്‍ 1.11 ലക്ഷം സ്ത്രീകളും 1.01 ലക്ഷം പുരുഷ വോട്ടര്‍മാരുമാണുള്ളത്. ചേലക്കരയില്‍ 1375 പേര്‍ ഹോം വോട്ട് രേഖപ്പെടുത്തിയിട്ടുണ്ട്.

പ്രിയങ്ക ഗാന്ധിയുടെ സാന്നിധ്യം കൊണ്ട് വയനാട് ദേശീയശ്രദ്ധ നേടിയപ്പോള്‍ ചേലക്കര ഇക്കുറി ഇഞ്ചോടിഞ്ച് പോരാട്ടം കൊണ്ടാണ് ശ്രദ്ധേയമാകുന്നത്.വോട്ടെടുപ്പ് ദിനമായ ബുധനാഴ്ച ഉച്ചയോടെ പ്രിയങ്ക ഡല്‍ഹിയിലേക്ക് തിരിക്കും. അതിനുമുമ്പ് വൈത്തിരി മേഖലയിലെ ചില ബൂത്തുകള്‍ അവര്‍ സന്ദര്‍ശിക്കും. വയനാട്ടിനും ചേലക്കരക്കുമൊപ്പം ഉപതെരഞ്ഞെടുപ്പ് പ്രഖ്യാപിച്ച പാലക്കാട്ട് പോളിങ് ഒരാഴ്ച നീട്ടി. നവംബര്‍ 20നാണ് പാലക്കാട്ടെ പോളിങ്.

അതിനിടെ, പ്രിയങ്ക ഗാന്ധി തെരഞ്ഞെടുപ്പ് ചട്ടം ലംഘിച്ചെന്ന് ആരോപിച്ച് എല്‍.ഡി.എഫ് വയനാട് പാര്‍ലമെന്റ് മണ്ഡലം കമ്മിറ്റി തെരഞ്ഞെടുപ്പ് കമീഷന് പരാതി നല്‍കിയിട്ടുണ്ട്. കഴിഞ്ഞ ദിവസം പള്ളിക്കുന്ന് ദേവാലയത്തിലെത്തിയ പ്രിയങ്ക ദേവാലയത്തിനുള്ളില്‍ വൈദികരുടെയും സന്യസ്തരുടെയും വിശ്വാസികളുടെയും സാന്നിധ്യത്തില്‍ പ്രാര്‍ഥന നടത്തുന്നതിന്റെ വിഡിയോയും ചിത്രങ്ങളുമെടുത്ത് പ്രചാരണത്തിന് ഉപയോഗിച്ചെന്നാണ് പരാതി. 

നിശബ്ദ പ്രചാരണദിനത്തില്‍ ചേലക്കരയില്‍ വാര്‍ത്താസമ്മേളനം വിളിച്ച ഡി.എം.കെ നേതാവ് പി.വി. അന്‍വര്‍ എം.എല്‍.എക്ക് തെരഞ്ഞെടുപ്പ് കമീഷന്‍ നോട്ടിസ് നല്‍കി.

Voting has commenced in Wayanad and Chelakkara constituencies, with high expectations from political parties. Priyanka Gandhi (UDF) is the star candidate in Wayanad, while the Chelakkara seat sees a tight contest.