കിളിമാനൂര്‍ : വിധിയൊരുക്കിയ ദുരിതകയത്തില്‍ ജീവിതം തള്ളിനീക്കുകയാണ് അടച്ചുറപ്പില്ലാത്ത മണ്‍വീട്ടില്‍ ആറുപേര്‍. കിളിമാനൂര്‍ പഞ്ചായത്തിലെ മലയ്ക്കല്‍ തെന്നൂര്‍ ഈന്തന്നൂര്‍ പുത്തന്‍വീട്ടില്‍ രമാദേവിയും കുടുംബവുമാണ് സഹജീവികളുടെ ഒരിറ്റു കനിവിനായി കാത്തിരിക്കുന്നത്.കശുവണ്ടിതൊഴിലാളിയായിരുന്ന രമാദേവി പലവിധ അസുഖങ്ങളായതോടെ ജോലിക്ക്‌പോകാനാകാത്തസ്ഥിതിയിലായി.
ഏക മകള്‍ സുനിതകുമാരിയും രോഗങ്ങളോട് പടപൊരുതുകയാണ്.സുനിതകുമാരിയുടെ ഭര്‍ത്താവ് അജികുമാര്‍ ജീവിക്കാന്‍ നിവര്‍ത്തിയില്ലാതെ ഏഴുമാസങ്ങള്‍ക്ക് മുമ്പ് ആത്മഹത്യ ചെയ്തു. ഈ ദമ്പതികള്‍ക്ക് മൂന്ന് പെണ്‍കുട്ടികളാണ്.പുതുമംഗലം യു പി എസിലെയുംപനപ്പാംകുന്ന് ഗവ എല്‍ പി എസിലെയും വിദ്യാര്‍ഥികളാണവര്‍.
കൂലിപ്പണിയെടുത്തെങ്കിലും പഠനത്തില്‍ അതീവമിടുക്കികളായ കുരുന്നുകളെ വളര്‍ത്താമെന്ന് സുനിതകുമാരി കരുതിയെങ്കിലും രോഗങ്ങള്‍ തടസമായി. സുനിതകുമാരിക്കും മാതാവ് രമാദേവിക്കും കുഞ്ഞുങ്ങള്‍ക്കുമൊപ്പം രമാദേവിയുടെ മാതാവ് പങ്കജാക്ഷിഅമ്മയും ഇവര്‍ക്കൊപ്പമുണ്ട്.ആറുപേര്‍ക്കുള്ള ഭക്ഷണം കണ്ടെത്തുന്നതിനുള്ള സാമ്പത്തിക സ്ഥിതി പോലും ഈ കുടുംബത്തിനില്ല. രമാദേവിക്കും, മാതാവിനുമുള്ള വാര്‍ദ്ധക്യകാലപെന്‍ഷനാണ് ആകെയുള്ള വരുമാനം.ആകെയുള്ള ആറു സെന്റ് പുരയിടത്തില്‍ വിണ്ടുകീറി ചാണകംമെഴുകിയ തറയും മണ്‍ഭിത്തിയുമുള്ള ഇവരുടെ വീടിന് സുരക്ഷയൊരുക്കിയിരുന്ന തകരഷീറ്റ് ഏതു നിമിഷവും പൊളിഞ്ഞുവീഴാവുന്ന സ്ഥിതിയിലാണ്.ഒറ്റമുറിയായാലും അടച്ചുറപ്പുള്ള ഒരുവീട്, കുട്ടികളെ പഠിപ്പിക്കാന്‍ ഒരു സ്ഥിര വരുമാനം അത്രയേ ഇവര്‍ ആഗ്രഹിക്കുന്നുള്ളൂ.