ജിദ്ദ: സഊദി അറേബ്യയിലെ ജിദ്ദയില്‍ ഈ വര്‍ഷത്തെ IPL താരലേലത്തില്‍ ആളുകള്‍ തലയില്‍ കൈവച്ചുപോയത് 13 കാരനായ ബിഹാറി പയ്യനെ രാജസ്ഥാന്‍ റോയല്‍സ് 1.10 കോടി രൂപയ്ക്ക് വിളിച്ചെടുത്തുവെന്ന വാര്‍ത്ത കേട്ടതോടെയാണ്. രാജസ്ഥാന്‍ റോയല്‍സും ഡല്‍ഹി ക്യാപിറ്റല്‍സും വൈഭവ് സൂര്യവംശിക്കായി മത്സരിച്ച് ലേലംവിളിച്ചതോടെയാണ് പയ്യന്റെ താരമൂല്യം 1.10 കോടിയിലെത്തിയത്. അടിസ്ഥാന വില 30 ലക്ഷം ആയിരുന്നു. ഇവിടുന്നാണ് ലേലം വിളി ഒരുകോടിയും പിന്നിട്ടത്. ഇന്നലെ ജിദ്ദയില്‍ നടന്ന ഐ.പി.എല്‍ ലേലത്തിലാണ് ഈ സുവര്‍ണ്ണ മുഹൂര്‍ത്തത്തിന് സാക്ഷ്യം വഹിച്ചത്.

ഇതോടെ ഐ.പി.എല്‍ എന്ന ലീഗിനെക്കാള്‍ പ്രായം കുറഞ്ഞ താരമാകുകയുംചെയ്തു വൈഭവ്. അതായത് IPL തുടങ്ങിയ ശേഷമാണ് വൈഭവ് ജനിച്ചത് തന്നെ. രാജസ്ഥാന്‍ റോയല്‍സിന്റെ മുഖ്യ പരിശീലകനായ ക്രിക്കറ്റ് ഇതിഹാസം രാഹുല്‍ ദ്രാവിഡിനൊപ്പം പ്രവര്‍ത്തിക്കാനും വൈഭവിന് കഴിയും. രാജസ്ഥാനാണ് വൈഭവിനെ സ്വന്തമാക്കിയതെങ്കിലും ഈ കൗമാര വിസ്മയത്തെ സ്വാഗതം ചെയ്ത് മിക്ക ടീമുകളും സമൂഹമാധ്യമങ്ങളില്‍ പോസ്റ്റ് പങ്കുവെച്ചു.

 

 

ആരാണ് വൈഭവ് സൂര്യവംശി

2011 മാര്‍ച്ച് 27ന് ബിഹാറിലെ സമസ്തിപൂരിലാണ് ജനനം. പഠനത്തില്‍ വലിയ താല്‍പ്പര്യം കാണിക്കാതെ എപ്പോഴും ക്രിക്കറ്റ്കളിച്ചുനടന്ന പയ്യനെ പിതാവ് സഞ്ജിവ് സൂര്യവംശി ഒമ്പതാം വയസ്സില്‍ സമസ്തിപൂരിലെ ക്രിക്കറ്റ് അക്കാദമിയില്‍ ചേര്‍ത്തു. അവിടെ എത്തിയതോടെയാണ് വൈഭവ് എന്ന വിസ്മയം രൂപപ്പെടുന്നത്. അവിടെവച്ച് തന്നെക്കാള്‍ പ്രായമുള്ളവര്‍ക്കൊപ്പം വൈഭവ് കളിച്ചുവളര്‍ന്നു.

പന്ത്രണ്ടാംവയസ്സില്‍ വിനു മങ്കാദ് ട്രോഫിയില്‍ ബിഹാറിനെ പ്രതിനിധീകരിച്ചു. അഞ്ച് മത്സരങ്ങളില്‍ നിന്ന് 400 ലധികം റണ്‍സ് നേടി. ഈ നേട്ടം ദേശീയ ശ്രദ്ധ പിടിച്ചുപറ്റി. ചെന്നൈയില്‍ നടന്ന യൂത്ത് ടെസ്റ്റില്‍ ഓസ്‌ട്രേലിയന്‍ അണ്ടര്‍19 ടീമിനെതിരെ മിന്നുന്ന സെഞ്ച്വറി നേടിയതോടെ വൈഭവ് ഭാവി താരമാണെന്ന് പലരും ഉറപ്പിക്കുകയും ചെയ്തു.

ഈ വര്‍ഷമാദ്യം പന്ത്രണ്ടാം വയസ്സില്‍ ബിഹാറിനായി രഞ്ജി ട്രോഫി അരങ്ങേറ്റം കുറിച്ചു. ഇംഗ്ലണ്ടിനും ബംഗ്ലദേശിനുമെതിരായ അണ്ടര്‍ 19 പരമ്പരകളില്‍ വൈഭവ് ദേശീയ ടീമിനെ പ്രതനിധീകരിച്ചു. ഓസ്‌ട്രേലിയന്‍ അണ്ടര്‍ 19 ടീമിനെതിരായ ടെസ്റ്റ് മത്സരത്തില്‍ ഇന്ത്യന്‍ അണ്ടര്‍ 19 ടീമിനായും വൈഭവ് കളിച്ചു. 2024 ജനുവരിയില്‍ മുംബൈയ്‌ക്കെതിരായ ബിഹാറിന്റെ രഞ്ജി ട്രോഫി മത്സരത്തില്‍ ജഴ്‌സിയണിയുമ്പോള്‍ വൈഭവിന്റെ പ്രായം 12 വര്‍ഷവും 284 ദിവസവും മാത്രം. ഫസ്റ്റ് ക്ലാസ് ക്രിക്കറ്റില്‍ അരങ്ങേറ്റം കുറിക്കുന്ന ഏറ്റവും പ്രായം കുറഞ്ഞ ഇന്ത്യക്കാരനായും വൈഭവ് മാറി. ഈ മത്സരത്തില്‍ സെഞ്ചുറിയും നേടി. ക്രിക്കറ്റിലെ എല്ലാ പ്രായവിഭാഗങ്ങളിലുമായി രാജ്യാന്തര സെഞ്ചുറി നേടുന്ന പ്രായം കുറഞ്ഞ താരമെന്ന റെക്കോര്‍ഡാണ് ഇതോടെ വൈഭവ് സ്വന്തമാക്കിയത്. ഇന്ത്യ അണ്ടര്‍ 19 ടീമിന് വേണ്ടിയുള്ള തന്റെ കന്നി സെഞ്ച്വറി വെറും 58 പന്തിലാണ് വൈഭവ് തികച്ചത്.

Jeddah’s IPL auction: Vaibhav Suryavanshi becomes youngest player ever to be sold