മലപ്പുറം: കാണം വിറ്റും ഓണം ഉണ്ണണമെന്നാണു പഴമൊഴി. അഞ്ചു മാസമായി ശമ്പളം കിട്ടാതെ ജോലി ചെയ്യുന്ന ബദല്‍ സ്‌കൂള്‍ അധ്യാപകര്‍ ഇതിനും വഴിയില്ലാതെ കഷ്ടപ്പെടുകയാണ്. ജില്ലയിലെ 67 ബദല്‍ സ്‌കൂളുകളിലായി ജോലി ചെയ്യുന്ന 77 അധ്യാപകരാണ് അഞ്ചു മാസമായി ശമ്പളമില്ലാതെ ജോലി  ചെയ്യുന്നത്.
മാര്‍ച്ച് മാസത്തിലാണ് ഇവര്‍ക്ക് അവസാനമായി ശമ്പളം ലഭിച്ചത്. ഏകാധ്യാപകര്‍ക്ക് 5000 രൂപ മാത്രമാണു പ്രതിമാസ ശമ്പളം. ദിവസക്കൂലി നോക്കിയാല്‍ സ്‌കൂളുകളിലെ പാചക തൊഴിലാളികളേക്കാളും കുറഞ്ഞ ശമ്പളമാണ് ഇവര്‍ക്കുള്ളത്.
1998ലാണു കേന്ദ്ര സര്‍ക്കാര്‍ കേന്ദ്ര മാനവശേഷി വികസന വകുപ്പിന്റെ സഹായത്തോടെ ബദല്‍ സ്‌കൂളുകള്‍ ആരംഭിക്കുന്നത്. ആദിവാസികളുടെയും മല്‍സ്യത്തൊഴിലാളികളുടെയും കുട്ടികള്‍ക്കു വിദ്യാഭ്യാസം ഉറപ്പാക്കുക എന്നതാണു ബദല്‍ സ്‌കൂളുകളുടെ പ്രവര്‍ത്തന ലക്ഷ്യം. തുടക്കത്തില്‍ 3000 രൂപയാണു ലഭിച്ചിരുന്നത്.  
വനമേഖല, കടലോര പ്രദേശങ്ങള്‍, ആദിവാസി ഊരുകള്‍ എന്നിവിടങ്ങളിലാണു ജില്ലയിലെ ബദല്‍ സ്‌കൂളുകള്‍ പ്രവര്‍ത്തിക്കുന്നത്. ഇവിടെ  വേണ്ടത്ര അടിസ്ഥാന സൗകര്യങ്ങള്‍ ഇല്ലാത്തതിനാല്‍ വിദ്യാര്‍ഥികളും പ്രയാസത്തിലാണ്. അതേസമയം ബദല്‍ സ്‌കൂള്‍ അധ്യാപകരുടെ വേതനം 10000 രൂപയാക്കി ഉയര്‍ത്തിയെന്നാണു സര്‍ക്കാര്‍ പറയുന്നത്.  മാസങ്ങളായി സര്‍ക്കാര്‍ ഇക്കാര്യം പറയുന്നുണ്ടെങ്കിലും ശമ്പളം കൂടിയോ എന്നറിയാന്‍ ഇവര്‍ക്കായിട്ടില്ല. തുച്ചമായ ശമ്പളവും കൃത്യമായി ലഭിക്കാതായതോടെ ജീവിക്കാന്‍ മറ്റു മാര്‍ഗങ്ങള്‍ കണ്ടെത്താനുള്ള ഒരുക്കത്തിലാണ് ജില്ലയിലെ ബദല്‍ സ്‌കൂള്‍ അധ്യാപകര്‍.