ബേ ഓവൽ: ശ്രീലങ്കതിരെയുള്ള മൂന്ന് ട്വന്റി ട്വന്റി മത്സരങ്ങളുടെ പരമ്പരയിലെ ആദ്യ മത്സരത്തിൽ റെക്കോർഡ് കൂട്ടുകെട്ടുമായി ന്യൂസിലാൻഡ്. ന്യൂസിലാൻഡിന്റെ ട്വന്റി ട്വന്റിയിലെ ഏറ്റവും മികച്ച ആറാം വിക്കറ്റ് കൂട്ടുകെട്ടാണ് ശ്രീലങ്കക്കെതിരെ പിറന്നത്. ഡാറിൽ മിച്ചലും മൈക്കൽ ബ്രെസ്വെല്ലും ചേർന്നാണ് കൂറ്റൻ കൂട്ടുകെട്ട് സൃഷ്ടിച്ചത്. 105 റൺസാണ് ഇരുവരും ചേർന്ന് ആറാം വിക്കറ്റിൽ നേടിയത്. 2014ൽ ബ്രെണ്ടൻ മക്കല്ലവും റോഞ്ചിയും നേടിയ 84 റൺസിന്റെ റെക്കോർഡാണ് നീണ്ട പത്തു വർഷങ്ങൾക്ക് ശേഷം ഡാറിൽ മിച്ചാലും മൈക്കൽ ബ്രെസ്വെല്ലും ചേർന്ന് തകർത്തത്. 

ഡാറിൽ മിച്ചൽ 42 പന്തിൽ 62 റൺസാണ് നേടിയത്. നാല് ഫോറുകളും രണ്ട് സിക്സുകളും അടങ്ങുന്നതായിരുന്നു താരത്തിന്റെ ഇന്നിംഗ്സ്.  മൈക്കൽ ബ്രെസ്വെൽ 33 പന്തിൽ 53 റൺസും നേടി. നാല് വീതം ഫോറുകളും സിക്സുകളുമാണ് മൈക്കൽ ബ്രെസ്വെൽ അടിച്ചെടുത്തത്. മത്സരത്തിൽ തുടക്കത്തിൽ തന്നെ കിവീസിനെ ലങ്കൻ ബൗളർമാർ എറിഞ്ഞു വീഴ്ത്തുകയായിരുന്നു. 

മത്സരത്തിൽ 65 റൺസ് എടുക്കുന്നതിനിടെ അഞ്ചു വിക്കറ്റുകളാണ്‌ ന്യൂസിലാൻഡിനു നഷ്ടമായത്. എന്നാൽ പിന്നീട് ഈ സമ്മർദ്ദഘട്ടത്തിൽ നിന്നും മിച്ചാലും മൈക്കലും ചേർന്ന് ടീമിനെ മികച്ച സ്കോറിലേക്ക് നയിക്കുകയായിരുന്നു. ശ്രീലങ്കയുടെ ബൗളിങ്ങിൽ ബിനുറ ഫെർണാണ്ടോ, മഹേഷ് തീക്ഷണ. വനിന്ദു ഹസരങ്ക എന്നിവർ രണ്ട് വീതം വിക്കറ്റും മതീഷ പാതിരാന ഒരു വിക്കറ്റും നേടി.