ദുബൈ: യുഎഇയിലെ പകുതിയോളം ഉപഭോക്താക്കളും മികച്ച ഉല്‍പ്പന്ന തിരഞ്ഞെടുപ്പുകള്‍ക്കായി ഓണ്‍ലൈന്‍ പ്ലാറ്റ്‌ഫോമുകളെയാണ് ആശ്രയിക്കുന്നതെന്ന് പഠനങ്ങള്‍. ലോകത്തെ ഏറ്റവും പ്രധാനപ്പെട്ട ഫിനാന്‍ഷ്യല്‍ ടെകനോളജി സ്ഥാപനമായ ചെക്ക്ഔട്ട് നടത്തിയ പഠനത്തിലാണ് ഇക്കാര്യങ്ങള്‍ കണ്ടെത്തയത്. പുറത്ത് കടകളില്‍ പോയി സാധനങ്ങള്‍ നോക്കുമെങ്കിലും മിക്കവരും തങ്ങള്‍ക്ക് ആവശ്യമായ വസ്തുക്കള്‍ വാങ്ങുന്നതിനായി ഓണ്‍ലൈന്‍ ആപ്പുകളെയും വെബ്‌സൈറ്റുകളെയുമാണ് സമീപിക്കുന്നതെന്നും ചെക്കഔട്ട് സൂചിപ്പിക്കുന്നു.  

വിഷ്വല്‍ സെര്‍ച്ച്, വെര്‍ച്വല്‍ ട്രൈഓണുകള്‍, ഇന്റലിജന്റ് ചാറ്റ്‌ബോട്ടുകള്‍ തുടങ്ങിയ AI അധിഷ്ഠിത ഷോപ്പിംഗ് ഉപകരണങ്ങളെ ആശ്രയിക്കുന്നവരുടെ എണ്ണം വര്‍ധിച്ചുവരുന്നതായും ഇത് യുഎഇയെ ഡിജിറ്റല്‍ ഷോപ്പിംഗ് നവീകരണത്തിനുള്ള ഏറ്റവും നൂതനമായ വിപണികളിലൊന്നായി മാറ്റുന്നതായും റിപ്പോര്‍ട്ട് വെളിപ്പെടുത്തുന്നു.

യുഎഇയിലെ ഉപഭോക്താക്കളില്‍ മൂന്നിലൊന്നില്‍ കൂടുതല്‍, അതായത് 37 ശതമാനം പേര്‍, ഉല്‍പ്പന്നങ്ങള്‍ കൂടുതല്‍ കാര്യക്ഷമമായി കണ്ടെത്തുന്നതിന് വിഷ്വല്‍ സെര്‍ച്ച് AI ഉപയോഗിക്കുന്നു. വെര്‍ച്വല്‍ ട്രൈഓണുകള്‍ മുതല്‍ AIയില്‍ പ്രവര്‍ത്തിക്കുന്ന മറ്റു ചാറ്റ്‌ബോട്ടുകളും മറ്റു രാജ്യങ്ങളിലെ ഉപഭോക്താക്കളെ അപേക്ഷിച്ച് യുഎഇയിലെ ഉപഭോക്താക്കള്‍ ബുദ്ധിപരമായി ഉപയോഗിക്കുന്നുവെന്നും റിപ്പോര്‍ട്ടില്‍ പറയുന്നു.

'ഓണ്‍ലൈന്‍ ഇടപാടുകളുടെ സൗകര്യവും സുരക്ഷയും വര്‍ധിപ്പിക്കുന്ന ഒരു ഡിജിറ്റല്‍ ആവാസവ്യവസ്ഥ വളര്‍ത്തിയെടുക്കുന്നതില്‍ യുഎഇ സര്‍ക്കാര്‍ ഒരു പ്രധാന പങ്ക് വഹിച്ചിട്ടുണ്ട്. നൂതന സാങ്കേതികവിദ്യകള്‍ വ്യാപകമായി സ്വീകരിക്കുന്നതിന് ഈ മുന്‍കരുതല്‍ സമീപനം ശക്തമായ അടിത്തറ പാകിയിട്ടുണ്ട്,' മെന മേഖലയിലെ ചെക്കഔട്ട് ജനറല്‍ മാനേജര്‍ റെമോ ജിയോവാന്നി പറഞ്ഞു.

ക്യാഷ് ഓണ്‍ ഡെലിവറിയില്‍ കുത്തനെയുള്ള ഇടിവ്‌

ലോകത്തിലെ ഏറ്റവും ഉയര്‍ന്ന ഇന്റര്‍നെറ്റ്, മൊബൈല്‍ വ്യാപന നിരക്കുകളുള്ള രാജ്യങ്ങളില്‍ ഒന്നാണ് യുഎഇ. പ്രത്യേകിച്ച് കോവിഡ് പാന്‍ഡെമിക്കിന് ശേഷം ഓണ്‍ലൈന്‍ ഷോപ്പിംഗ് കൂടുതല്‍ സുഗമവും വേഗമേറിയതുമായിരുന്നു.

കൂടാതെ, യുഎഇയിലെ ഏകദേശം 62 ശതമാനം  ഉപഭോക്താക്കളും അടുത്ത വര്‍ഷം ഓണ്‍ലൈന്‍ ഷോപ്പിംഗ് വര്‍ധിപ്പിക്കാന്‍ പദ്ധതിയിടുന്നതായും റിപ്പോര്‍ട്ടില്‍ പറയുന്നു. 

ഡിജിറ്റല്‍ ഷോപ്പിംഗിന്റെ സൗകര്യവും ലഭ്യതയും കൂടുതല്‍ ഉപഭോക്താക്കള്‍ സ്വീകരിക്കുന്നതോടെ, യുഎഇയില്‍ ക്യാഷ്ഓണ്‍ഡെലിവറി മുന്‍ഗണന കുത്തനെ കുറഞ്ഞുവരികയാണ്. 2020 മുതല്‍ ക്യാഷ്ഓണ്‍ഡെലിവറി ഉപയോഗം 53 ശതമാനം കുറഞ്ഞതായാണ് കണക്കുകള്‍ പറയുന്നത്. വില കുറവും മികച്ച ഉല്‍പ്പന്നങ്ങളുടെ വിശാലമായ ശേഖരവുമാണ് ഉപഭോക്താക്കളെ ഓണ്‍ലൈന്‍ ഷോപ്പിംഗിലേക്ക് ആകര്‍ഷിക്കുന്നത്.

More than 50% of consumers in the UAE now use online shopping platforms regularly.