ഹരാരെ: ഒരുപിടി റെക്കോര്‍ഡുകള്‍ പിറന്ന സിംബാബ്‌വെയും അഫ്ഗാനിസ്ഥാനും തമ്മിലുള്ള ആദ്യ ടെസ്റ്റ് സമനിലയില്‍ അവസാനിച്ചു. സിംബാബ്‌വെ 586 റണ്‍സ് നേടിയപ്പോള്‍ ഹഷ്മത്തുള്ള ഷാഹിദിയുടെയും റഹ്മത്ത് ഷായുടെയും ചരിത്ര പ്രകടനത്തോടെ അഫ്ഗാനിസ്ഥാന്‍ 699 റണ്‍സെടുത്തു. സിംബാബ്‌വെയുടെ ബ്രയാന്‍ ബെന്നറ്റ് പന്തുകൊണ്ടും ബാറ്റുകൊണ്ടും ഒരുപോലെ തിളങ്ങി. മഴ കളിച്ചതോടെ ടെസ്റ്റ് സമനിലയില്‍ കലാശിക്കുകയായിരുന്നു. രണ്ടാം ടെസ്റ്റ് വ്യാഴാഴ്ച ബുലവായോയില്‍ തുടങ്ങും.

ക്രിക്കറ്റ് ലോകത്ത് സ്വന്തം മേല്‍വിലാസം എഴുതിച്ചേര്‍ക്കാന്‍ ശ്രമിക്കുന്ന ഇരു ടീമുകളും റെക്കോര്‍ഡ് നേട്ടങ്ങളാണ് ടെസ്റ്റ് മത്സരത്തില്‍ കൈവരിച്ചത്. ആദ്യ ഇന്നിംഗ്‌സില്‍ സിംബാബ്‌വെ 586 റണ്‍സിന്റെ കൂറ്റന്‍ സ്‌കോറാണ് നേടിയത്. 2001ല്‍ വെസ്റ്റ് ഇന്‍ഡീസിനെതിരെ നേടിയ ടെസ്റ്റ് സ്‌കോറായ 563/9-ാണ് ഇതോടെ സിംബാബ്‌വെ മറികടന്നത്. അഫ്ഗാനിസ്ഥാന്‍ 699 റണ്‍സിന് ഓള്‍ഔട്ടായി. 2021ല്‍ സിംബാബ് വെക്കെതിരെ അഫ്ഗാനിസ്ഥാന്‍ നേടിയ 545/4 എന്ന സ്‌കോറാണ് പഴങ്കഥയായത്. 

രണ്ടാം ഇന്നിംഗ്‌സില്‍ സിംബാബ്‌വെ 142 ന് 4 എന്ന നിലയില്‍ എത്തിയപ്പോള്‍ മഴ കളിക്കുകയായിരുന്നു.