തിരുവനന്തപുരം: 'തോണിയില്‍ പങ്കായം തുഴഞ്ഞു ലക്ഷ്യമില്ലാതെ സഞ്ചരിക്കുന്നില്ലെങ്കില്‍ നിങ്ങള്‍ അവരല്ല, കണ്‍കണ്ട തെരുവില്‍ ചുമര് കിടപ്പറയാക്കുന്നില്ലെങ്കില്‍ നിങ്ങള്‍ അവരല്ല,
മരിച്ചു മണ്ണായിക്കഴിഞ്ഞ മനുഷ്യര്‍, നിങ്ങളുണ്ടാക്കിയ നരകത്തില്‍ കിടന്നെങ്കിലും പറയട്ടെ 'ഞങ്ങളും മനുഷ്യരാണെന്ന്...'

സംസ്ഥാന സ്‌കൂള്‍ കലോത്സവത്തില്‍ ഹൈസ്‌കൂള്‍ വിഭാഗം മലയാളം കവിതാ രചനയില്‍ ഒന്നാം സ്ഥാനം നേടിയ 'നരകത്തിലെ അവരും പിന്നെ നിങ്ങളും' എന്ന കവിതയിലെ വരികളാണിത്. എഴുതിയതാകട്ടെ ഉപഭാഷയായിപ്പോലും മലയാളം പഠിച്ചിട്ടില്ലാത്ത പത്താംതരം വിദ്യാര്‍ഥിയും.അരീക്കോട് സുല്ലമുസ്സലാം ഹയര്‍ സെക്കന്‍ഡറി സ്‌കൂള്‍ വിദ്യാര്‍ഥി സ്വബിര്‍ ജമീല്‍ മലയാളം മീഡിയം വിദ്യാര്‍ഥികളോട് മത്സരിച്ചാണ് ഒന്നാമതെത്തിയത്. 

അനാഥത്വത്തിന്റെയും നിരാശ്രയത്വത്തിന്റെയും ഉപ്പുകടലിലാണ് സ്വാബിറിന്റെ കവിത നങ്കൂരമിടുന്നത്. സുഖലോലുപതയുടെ ആഡംബര നൗകയില്‍ ലോകം കാണാനിറങ്ങിയതല്ല അവന്‍. വംശീയതയുടെ തീക്കാറ്റ് റോഹിംഗ്യന്‍ ജനതയെപ്പോലെ അവനെയും പൊള്ളിക്കുന്നുണ്ട്. ഭാഷയുടെ അതിര്‍വരമ്പുകള്‍ക്കും രാജ്യാതിര്‍ത്തികള്‍ക്കും മുകളിലാണ് സ്വാബിറിന്റെ വാക്കുകള്‍ നിലയുറപ്പിക്കുന്നത്. 

ആദ്യമായാണ് സ്വാബിര്‍ ജമീല്‍ സംസ്ഥാന കലോത്സവത്തിന് എത്തുന്നത്. കേരള സര്‍വകലാശാലയിലെ പ്രൊഫസര്‍ ജൗഹറിന്റെയും മലപ്പുറം കിഴുപറമ്പ് ഹയര്‍ സെക്കന്‍ഡറി സ്‌കൂള്‍ അധ്യാപിക സൗദയുടെയും മകനാണ്. സഹോദരി മറിയം ബദൂദ.

Swabir Jameel, a 10th-grade student from Areekode Sullamussalam Higher Secondary School, clinched the first prize in the Malayalam poetry writing competition at the Kerala School Arts Festival.