റിയാദ്: സഊദിയുടെ വിവിധ ഭാഗങ്ങളില്‍ മഴ പെയ്യുന്നതിനിടെ മദീനയില്‍ കനത്ത മഴ. ജനുവരി 6 തിങ്കളാഴ്ച പുലര്‍ച്ചെ മദീന നഗരം ആലിപ്പഴ വര്‍ഷവത്തിനും ഇടിമിന്നലിനും ശക്തമായ മഴയ്ക്കും സാക്ഷ്യം വഹിച്ചു.

ജിദ്ദയിലും മക്കയിലും കനത്ത മഴയ്ക്ക് സാധ്യതയുള്ളതിനാല്‍ നാഷണല്‍ സെന്റര്‍ ഓഫ് മെറ്റീരിയോളജി (എന്‍സിഎം) റെഡ് അലര്‍ട്ട് പ്രഖ്യാപിച്ചു. രാജ്യത്തിന്റെ വിവിധ പ്രദേശങ്ങളില്‍ ഇടിമിന്നലുണ്ടാകുമെന്ന പ്രവചനങ്ങള്‍ക്കിടയില്‍ അതീവ ജാഗ്രത പുലര്‍ത്തണമെന്ന് ജനറല്‍ ഡയറക്ടറേറ്റ് ഓഫ് സിവില്‍ ഡിഫന്‍സ് ശനിയാഴ്ച പൊതുജനങ്ങളോട് അഭ്യര്‍ത്ഥിച്ചു. വെള്ളപ്പൊക്കത്തിന് സാധ്യതയുള്ള താഴ്‌വരകളും സ്ഥലങ്ങളും ഒഴിവാക്കാനും, പ്രത്യേകിച്ച് നീന്തലിനായി സുരക്ഷിതമായ സ്ഥലങ്ങളില്‍ തിരഞ്ഞെടുക്കാനും ആവശ്യപ്പെട്ടു.

ബുധനാഴ്ച വരെ രാജ്യത്തിന്റെ മിക്ക ഭാഗങ്ങളിലും ഇടിമിന്നലുണ്ടാകുമെന്ന് പ്രവചിക്കപ്പെട്ടതിനാല്‍, സോഷ്യല്‍ മീഡിയയില്‍ പോസ്റ്റ് ചെയ്ത നിര്‍ദ്ദേശങ്ങള്‍ ആളുകള്‍ ശ്രദ്ധിക്കണമെന്ന് സിവില്‍ ഡിഫന്‍സ് അഭ്യര്‍ത്ഥിച്ചു.