ന്യൂഡല്‍ഹി: വി.എച്ച്.പി യോഗത്തില്‍ പങ്കെടുത്ത് മുസ് ലിംകള്‍ക്കും ഭരണഘടനയ്ക്കും എതിരേ അലഹബാദ് ഹൈക്കോടതി ജഡ്ജി ശേഖര്‍ കുമാര്‍ യാദവ് പ്രസംഗിച്ചതില്‍ ഹൈക്കോടതിയുടെ റിപ്പോര്‍ട്ട് തേടി സുപ്രിംകോടതി. അലഹാബാദ് ഹൈക്കോടതി ചീഫ്ജസ്റ്റിസ് അരുണ്‍ ഭാന്‍സാലിക്ക് കത്തെഴുതിയാണ് സുപ്രിംകോടതി ചീഫ്ജസ്റ്റിസ് സഞ്ജീവ് ഖന്ന പുതിയ വിവരങ്ങള്‍ ആവശ്യപ്പെട്ടത്.

പ്രസംഗത്തില്‍ വിശദീകരണം ആവശ്യപ്പെട്ട് കഴിഞ്ഞമാസം 17ന് ജഡ്ജിയെ സുപ്രിംകോടതി കൊളീജിയം വിളിപ്പിച്ചിരുന്നു. ജസ്റ്റിസ് യാദവിനെതിരേ കൊളീജിയം കടുത്ത നടപടിയാണ് സ്വീകരിച്ചിരുന്നത്. ജഡ്ജി പരസ്യമായി മാപ്പുപറയണമെന്ന് കൊളീജിയം ആവശ്യപ്പെട്ടിരുന്നു. അംഗീകരിക്കാന്‍ കഴിയാത്ത പരാമര്‍ശങ്ങള്‍ ആണ് ജഡ്ജിയില്‍നിന്നുണ്ടായതെന്ന് വിലയിരുത്തിയ കൊളീജിയം, ജുഡീഷ്യറിയുടെ അന്തസ്സ് നിലനിര്‍ത്തണമെന്നും അതിന് പരസ്യമായി ക്ഷമാപണം നടത്തണമെന്നും ആവശ്യപ്പെട്ടു. എന്നാല്‍, മൂന്നാഴ്ച കഴിഞ്ഞിട്ടും മാപ്പപേക്ഷ ഇല്ലാതിരുന്നതോടെയാണ് ഇക്കാര്യം ഓര്‍മിപ്പിച്ചും പുതിയ വിവരങ്ങള്‍ ആവശ്യപ്പെട്ടും സുപ്രിംകോടതി ഇടപെടല്‍ നടത്തിയത്.

സിറ്റിങ് ജഡ്ജിയില്‍നിന്നുണ്ടായ ദുര്‍നടപ്പിന്റെ പേരില്‍ നടക്കുന്ന ആഭ്യന്തര അന്വേഷണത്തിന്റെ ഭാഗമായുള്ള നടപടികളാണ് ഇപ്പോള്‍ നടക്കുന്നതെന്നാണ് കോടതിയുമായി ബന്ധപ്പെട്ട വൃത്തങ്ങള്‍ വെളിപ്പെടുത്തിയത്. ജഡ്ജിയെ സ്ഥലം മാറ്റുന്നതും നീക്കംചെയ്യാന്‍ രാഷ്ട്രപതിക്ക് ശുപാര്‍ശചെയ്യുന്നതും ഉള്‍പ്പെടെയുള്ള നടപടികളാണ് നിലവില്‍ സുപ്രിംകോടതി മുമ്പാകെയുള്ളത്. ജഡ്ജിയെ നീക്കുന്ന നടപടിക്ക് ആഭ്യന്തര അന്വേഷണം ആവശ്യമാണ്.

പരാമര്‍ശങ്ങള്‍ ശരിയായ വിധത്തില്‍ എടുത്തിട്ടില്ലെന്നും മാധ്യമങ്ങള്‍ വളച്ചൊടിച്ചെന്നും ഇക്കാരണത്താല്‍ പൊതുവേദിയിലൂടെ വിശദീകരണം നല്‍കാന്‍ തയാറാണെന്നുമായിരുന്നു യാദവ് കൊളീജിയം മുമ്പാകെ സ്വീകരിച്ചത്. എന്നാല്‍ ഇത് കൊളീജിയം അംഗീകരിച്ചിരുന്നില്ല. പിന്നാലെ കോടതിക്കകത്തും പുറത്തുമുള്ള പെരുമാറ്റത്തില്‍ ജാഗ്രത വേണമെന്ന് ജഡ്ജിയെ ഓര്‍മിപ്പിക്കുകയുമുണ്ടായി. 

അലഹബാദ് ഹൈക്കോടതി ലൈബ്രറി ഹാളില്‍ വി.എച്ച്.പി സംഘടിപ്പിച്ച പരിപാടിയില്‍ പ്രസംഗിക്കവെയാണ് മൃഗങ്ങളെ അറുക്കുന്നത് കൊണ്ട് മുസ്ലിംകളുടെ മക്കള്‍ക്ക് സഹിഷ്ണുതയുണ്ടാകില്ലെന്നും ഭൂരിപക്ഷത്തിന്റെ ആഗ്രഹപ്രകാരമാണ് ഇന്ത്യ ഭരിക്കപ്പെടുകയെന്നും അടക്കമുള്ള പരാമര്‍ശങ്ങള്‍ ജഡ്ജി നടത്തിയത്. 

Justice Yadav's hate speech: Supreme Court seeks report from High Court