മാഡ്രിഡ്: റയൽ മാഡ്രിഡിനൊപ്പമുള്ള തന്റെ നിലവിലെ ഫോമിനെക്കുറിച്ച് സംസാരിച്ചിരിക്കുകയാണ് ഫ്രഞ്ച് സൂപ്പർതാരം കിലിയൻ എംബാപ്പെ. താൻ റയലിൽ എത്തിയത് മോശമായി കളിക്കാൻ അല്ലെന്നും ഇപ്പോൾ തനിക്ക് കൂടുതൽ കാര്യങ്ങൾ ടീമിനൊപ്പം ചെയ്യാനുണ്ടെന്നുമാണ് എംബാപ്പെ പറഞ്ഞത്. യുവേഫ ചാമ്പ്യൻസ് ലീഗിൽ ജർമൻ ക്ലബ് ആർബി സാൾസ് ബർഗിനെതിരെയുള്ള മത്സരത്തിന് മുന്നോടിയായിട്ടാണ് എംബാപ്പെ ഇക്കാര്യം സംസാരിച്ചത്. 

'ഇപ്പോൾ എനിക്ക് റയൽ മാഡ്രിഡിനൊപ്പം കൂടുതൽ കാര്യങ്ങൾ ചെയ്യേണ്ടതുണ്ട്. ഞാൻ എപ്പോഴും ടീമിനൊപ്പം ഉണ്ടായിരുന്നു. പക്ഷേ കൂടുതൽ കാര്യങ്ങൾ ചെയ്യേണ്ടതുണ്ടെന്ന് എനിക്കറിയാം. സാഹചര്യം മാറ്റേണ്ട സമയമാണിതെന്ന് ഞാൻ കരുതുന്നു. മോശമായി കളിക്കാനല്ല ഞാൻ മാഡ്രിഡിൽ വന്നത്. ഇപ്പോൾ ഞങ്ങൾ ഒരുമിച്ച് മുന്നോട്ട് പോകണം. മാഡ്രിഡിൽ ഞങ്ങൾ എപ്പോഴും നന്നായി കളിക്കണം,' എംബാപ്പെ പറഞ്ഞു.

റയൽ മാഡ്രിഡിനായി ഈ സീസണിൽ ഇതുവരെ 17 ഗോളുകളാണ് എംബാപ്പെ നേടിയിട്ടുള്ളത്. എന്നാൽ പല സമയങ്ങളിലും എംബാപ്പെ തന്റെ പ്രകടനങ്ങളുടെ പേരിൽ വിമർശിക്കപ്പെട്ടിണ്ട്. എന്നാൽ അവസാനം കളിച്ച മൂന്ന് മത്സരങ്ങളിലും തകർപ്പൻ പ്രകടനമാണ്‌ എംബാപ്പെ നടത്തിക്കൊണ്ടിരിക്കുന്നത്. നാല് ഗോളുകളാണ് താരം റയലിനായി അവസാന മൂന്ന് മത്സരങ്ങളിൽ നേടിയത്. 

നിലവിൽ ചാമ്പ്യൻസ് ലീഗ് പോയിന്റ് പട്ടികയിൽ ഒമ്പത് പോയിന്റുമായി ഇരുപതാം സ്ഥാനത്താണ് റയൽ മാഡ്രിഡ് ഉള്ളത്. അടുത്ത റൗണ്ടിലേക്ക് മുന്നേറണമെങ്കിൽ  റയലിന് മികച്ച പ്രകടനങ്ങൾ തന്നെ നടത്തേണ്ടി വരും.