റിയാദ്: സഊദി പ്രൊ ലീഗിൽ അൽ ഖലീജിനെതിരെ 3-1ന്റെ തകർപ്പൻ വിജയമാണ് അൽ നസർ സ്വന്തമാക്കിയത്. മത്സരത്തിൽ സൂപ്പർതാരം ക്രിസ്റ്റ്യാനോ റൊണാൾഡോ ഇരട്ടഗോൾ നേടി മിന്നും പ്രകടനമാണ് നടത്തിയത്. മത്സരത്തിന്റെ രണ്ടാം പകുതിയിൽ ആയിരുന്നു അൽ നസറിന്റെ മൂന്ന് ഗോളുകളും പിറന്നത്. 65, 90+8 എന്നീ മിനിറ്റുകളിലാണ് റൊണാൾഡോ ലക്ഷ്യം കണ്ടത്. 

ഈ രണ്ട് ഗോളുകൾക്ക് പിന്നാലെ അൽ നസറിനായി 100 ഗോൾ കോൺട്രിബ്യുഷൻ നടത്താനും റൊണാൾഡോക്ക് സാധിച്ചു. ഈ സീസണിൽ അൽ നസറിന് വേണ്ടി 19 ഗോളുകളും മൂന്ന് അസിസ്റ്റുകളുമാണ് റൊണാൾഡോ ഇതുവരെ നേടിയിട്ടുള്ളത്. 

മത്സരത്തിൽ റൊണാൾഡോക്ക് പുറമെ സുൽത്താൻ അൽ ഗന്നം(81) അൽ നസറിനായി ഗോൾ നേടി. അൽ ഖലീജിന് വേണ്ടി കോസ്റ്റാസ് ഫോർട്ടൂണിസ് ആണ് ഗോൾ നേടിയത്. അൽ ഖലീജ് താരം സയിദ് അൽ ഹംസൽ 34ാം മിനിറ്റിൽ ചുവപ്പ് കാർഡ് കണ്ട് പുറത്തായിരുന്നു. ഇതിനു ശേഷം 10 ആളുകളുമായാണ് അൽ ഖലീജ് പന്തുതട്ടിയത്. ഈ അവസരം കൃത്യമായി വിനിയോഗിക്കാൻ അൽ നസറിന് സാധിച്ചു. 

നിലവിൽ 16 മത്സരങ്ങൾ പിന്നിട്ടപ്പോൾ ഒമ്പത് വിജയവും അഞ്ചു സമനിലയും രണ്ട് തോൽവിയുമായി 32 പോയിന്റോടെ മൂന്നാം സ്ഥാനത്താണ് അൽ നസർ. ജനുവരി 26ന് അൽ ഫത്തേഹ് എസ്‌സിക്കെതിരെയാണ് അൽ നാസറിന്റെ അടുത്ത മത്സരം.