മുംബൈ: ബോളിവുഡ് സംവിധായകന്‍ രാം ഗോപാല്‍ വര്‍മ്മ ചെക്ക് കേസില്‍ കുറ്റക്കാരനെന്ന് കോടതി. കേസില്‍ അന്ധേരി മജിസ്‌ട്രേറ്റ് കോടതി അദ്ദേഹത്തിന് മൂന്നുമാസം തടവ് ശിക്ഷ വിധിച്ചു.  ചൊവ്വാഴ്ചയാണ് ഉത്തരവ് പുറപ്പെടുവിച്ചത്. ശിക്ഷ വിധിച്ച സമയത്ത് രാം ഗോപാല്‍ വര്‍മ്മ കോടതിയില്‍ ഹാജരായിരുന്നില്ല. തുടര്‍ന്ന് അദ്ദേഹത്തെ അറസ്റ്റു ചെയ്യാനായി ജാമ്യമില്ലാ വാറണ്ട് പുറപ്പെടുവിക്കാന്‍ മജിസ്‌ട്രേറ്റ് വൈ.പി. പൂജാരി ഉത്തരവിട്ടു.

കഴിഞ്ഞ ഏഴ് വര്‍ഷമായി ചെക്ക് കേസില്‍ വാദം കേള്‍ക്കുകയായിരുന്നു കോടതി. നെഗോഷ്യബിള്‍ ഇന്‍സ്ട്രുമെന്റ്‌സ് ആക്ടിലെ 138ാം വകുപ്പ് പ്രകാരമാണ് വര്‍മ്മ ശിക്ഷിക്കപ്പെട്ടത്. രാം ഗോപാല്‍ വര്‍മ മൂന്ന് മാസത്തിനകം പരാതിക്കാരന് 3.72 ലക്ഷം രൂപ നഷ്ടപരിഹാരം നല്‍കണമെന്നും അല്ലെങ്കില്‍ മൂന്ന് മാസം കൂടി തടവ് അനുഭവിക്കണമെന്നും കോടതി നിര്‍ദേശിച്ചിട്ടുണ്ട്. അക്കൗണ്ടില്‍ മതിയായ തുക ഇല്ലാത്തതിനാലാണ് ചെക്ക് മടങ്ങിയെന്ന് കാണിച്ച് 2018ല്‍ മഹേഷ്ചന്ദ്ര മിശ്ര എന്നയാള്‍ വര്‍മ്മയുടെ സ്ഥാപനത്തിനെതിരെ കേസ് നല്‍കുകയായിരുന്നു.

ഈ കേസില്‍, 2022 ജൂണില്‍ വര്‍മ്മയെ കോടതി ജാമ്യത്തില്‍ വിടുകയായിരുന്നു.