ലണ്ടൻ: ഇംഗ്ലീഷ് പ്രീമിയർ ലീഗിൽ നോട്ടിങ്ഹാം ഫോറസ്റ്റിനെതിരെ ആവേശകരമായ വിജയമാണ് ന്യൂകാസ്റ്റിൽ യുണൈറ്റഡ് സ്വന്തമാക്കിയത്. മത്സരത്തിൽ മൂന്നിനെതിരെ നാല് ഗോളുകൾക്കാണ് ന്യൂകാസ്റ്റിൽ വിജയിച്ചത്. ന്യൂകാസ്റ്റിലിനായി സ്വീഡിഷ് താരം അലക്‌സാണ്ടർ ഇസാക് ഇരട്ടഗോൾ നേടി തകർപ്പൻ പ്രകടനമാണ് നടത്തിയത്. ഈ രണ്ട് ഗോളുകൾക്ക് പിന്നാലെ ഇംഗ്ലീഷ് പ്രീമിയർ ലീഗിൽ 50 ഗോളുകൾ പൂർത്തിയാക്കാനും അലക്‌സാണ്ടറിന് സാധിച്ചു.

മാത്രമല്ല ഇപിഎല്ലിൽ ഏറ്റവും വേഗത്തിൽ ഈ നേട്ടം സ്വന്തമാക്കുന്ന ഏഴാമത്തെ താരമാവാനും സ്വീഡിഷ് താരത്തിന് സാധിച്ചു. 76 മത്സരങ്ങളിൽ നിന്നുമാണ് താരം ഈ നേട്ടത്തിലേക്ക് കാലെടുത്തുവെച്ചത്. ഇംഗ്ലീഷ് പ്രീമിയർ ലീഗിൽ ഏറ്റവും വേഗത്തിൽ 50 ഗോളുകൾ നേടിയത് മാഞ്ചസ്റ്റർ സിറ്റി സൂപ്പർതാരം ഏർലിങ് ഹാലണ്ട് ആണ്. 40 മത്സരങ്ങളിൽ നിന്നുമാണ് മാഞ്ചസ്റ്റർ സിറ്റി താരം ഈ നേട്ടം സ്വന്തമാക്കിയത്.

ഒരുകാലത്ത് ഇംഗ്ലീഷ് പ്രീമിയർ ലീഗിൽ മിന്നും പ്രകടനം നടത്തിയ സൂപ്പർതാരങ്ങളെയെല്ലാം മറികടന്നാണ് ഇസാക് ഈ നേട്ടം സ്വന്തമാക്കിയത്. ക്രിസ്റ്റ്യാനോ റൊണാൾഡോ, തിയറി ഹെൻറി, ഹാരി കെയ്ൻ, സെർജിയോ അഗ്യൂറോ എന്നിവരേക്കാൾ കുറവ് മത്സരങ്ങൾ കളിച്ചാണ് അലക്‌സാണ്ടർ ഈ നേട്ടം സ്വന്തമാക്കിയത്.  റൊണാൾഡോ 113 മത്സരങ്ങളിൽ നിന്നും ഈ നേട്ടം സ്വന്തമാക്കിയപ്പോൾ. ഹാരി കെയ്ൻ 90 മത്സരങ്ങളിൽ നിന്നും ഹെൻറി 83 മത്സരങ്ങളിൽ നിന്നും ഈ നേട്ടം സ്വന്തമാക്കി. അഗ്യൂറോ 81 മത്സരങ്ങളിൽ നിന്നുമാണ് 50 ഗോളുകൾ സ്വന്തമാക്കിയത്. 

അതേസമയം മത്സരത്തിൽ ഇസാക്കിന് പുറമെ ന്യൂകാസ്റ്റിലിന് വേണ്ടി ലൂയിസ് മൈലി, ജേക്കബ് മർഫി എന്നിവരാണ് ഗോളുകൾ നേടിയത്. കല്ലം ഹഡ്‌സൺ ഒഡോയ്, നിക്കോള മിലെൻകോവിച്ച്, റയാൻ യേറ്റ്സ് എന്നിവരാണ് നോട്ടിങ്ഹാം ഫോറസ്റ്റിന് വേണ്ടി ഗോളുകൾ നേടിയത്.