റിയാദ്: റിയാദിലെ ഒരു മസാജ് സെന്ററില്‍ അനാശാസ്യ പ്രവര്‍ത്തനങ്ങളില്‍ ഏര്‍പ്പെട്ട നാല് പ്രവാസികളെ സഊദി പൊലിസ് അറസ്റ്റ് ചെയ്തു. ഈ മാസം രാജ്യത്ത് റിപ്പോര്‍ട്ട് ചെയ്യപ്പെടുന്ന രണ്ടാമത്തെ കേസാണിത്.

റിയാദ് പൊലിസ്, കമ്മ്യൂണിറ്റി സെക്യൂരിറ്റി ആന്‍ഡ് കോംബാറ്റിംഗ് ഹ്യൂമന്‍ ട്രാഫിക്കിംഗ് വിഭാഗവുമായി സഹകരിച്ച് മസാജ് സെന്ററില്‍ പൊതു ധാര്‍മികത ലംഘിക്കുന്ന പ്രവൃത്തികള്‍ ചെയ്തതിനാണ് നാലുപേരെയും അറസ്റ്റ് ചെയ്തതെന്ന് രാജ്യത്തിന്റെ ജനറല്‍ ഡയറക്ടറേറ്റ് ഓഫ് പബ്ലിക് സെക്യൂരിറ്റി അറിയിച്ചു. ഇത്തരം കാര്യങ്ങളില്‍ ഏര്‍പ്പെടുന്നുവെന്ന് സംശയിക്കപ്പെടുന്നവര്‍ക്കെതിരെ നിയമ നടപടികള്‍ സ്വീകരിച്ചുവരികയാണെന്നും ലംഘനത്തില്‍ ഉള്‍പ്പെട്ട കേന്ദ്രത്തിനെതിരെ ശിക്ഷാനടപടികള്‍ സ്വീകരിക്കുമെന്നും അധികൃതര്‍ പറഞ്ഞു.

ഈ മാസം ആദ്യം, പൊതു ധാര്‍മികത ലംഘിക്കുന്ന പ്രവര്‍ത്തനങ്ങളില്‍ ഏര്‍പ്പെട്ടുവെന്ന് ആരോപിച്ച് തുറമുഖ നഗരമായ ജിദ്ദയിലെ ഒരു ബോഡി കെയര്‍ സെന്ററില്‍ നിന്നും സഊദി പൊലിസ് അഞ്ച് പ്രവാസികളെ അറസ്റ്റ് ചെയ്തിരുന്നു.

കഴിഞ്ഞ ആഴ്ചയാണ് അല്‍ ഖാസിം പ്രവിശ്യയുടെ മധ്യമേഖലയില്‍ അനാശാസ്യ പ്രവര്‍ത്തനങ്ങളില്‍ ഏര്‍പ്പെട്ടതിന് മൂന്ന് പ്രവാസികളെ അറസ്റ്റു ചെയ്തത്. ഒരു പുരുഷനെയും രണ്ട് സ്ത്രീകളെയുമാണ് പൊലിസ് കസ്റ്റഡിയിലെടുത്തത്. അടുത്തിടെ രൂപീകരിച്ച കമ്മ്യൂണിറ്റി സുരക്ഷയ്ക്കും മനുഷ്യക്കടത്തിനുമുള്ള പൊതു വകുപ്പുമായി ഏകോപിപ്പിച്ചാണ് അറസ്റ്റ് നടന്നത്.

കഴിഞ്ഞ ആഴ്ചയും റിയാദിലെ ഒരു ഹോട്ടലില്‍ അനാശാസ്യ പ്രവര്‍ത്തനം ആരോപിച്ച് മൂന്ന് വിദേശ സ്ത്രീകളെ സഊദി പോലിസ് അറസ്റ്റ് ചെയ്തിരുന്നു. റിയാദ് പൊലിസ് ജനറല്‍ ഡിപ്പാര്‍ട്ട്‌മെന്റ് ഫോര്‍ കമ്മ്യൂണിറ്റി സെക്യൂരിറ്റി ആന്‍ഡ് കോംബാറ്റിംഗ് ഹ്യൂമന്‍ ട്രാഫിക്കിംഗ് ക്രൈംസുമായി സഹകരിച്ച് നടത്തിയ സുരക്ഷാ റെയ്ഡിലാണ് ഇവരെ അറസ്റ്റ് ചെയ്തത്.

ഈ മാസം ആദ്യമാണ് സുരക്ഷാ സംവിധാനത്തിന്റെയും കുറ്റകൃത്യങ്ങള്‍ തടയുന്നതിനുള്ള സംവിധാനത്തിന്റെയും കാര്യക്ഷമത വികസിപ്പിക്കുന്നതിനും മെച്ചപ്പെടുത്തുന്നതിനുമായി കമ്മ്യൂണിറ്റി സുരക്ഷയ്ക്കും മനുഷ്യക്കടത്ത് കുറ്റകൃത്യങ്ങള്‍ക്കെതിരെയും സഊദി ആഭ്യന്തര മന്ത്രാലയം ജനറല്‍ വകുപ്പ് സ്ഥാപിച്ചത്.

Four people were arrested in Saudi Arabia for engaging in unethical activities under the guise of a massage center