റിയാദ്: രാജ്യത്തിനുള്ളിലേക്ക് നിയമം ലംഘിച്ച് സാധനങ്ങൾ കൊണ്ടുപോകുന്ന വിദേശ ട്രക്കുകൾക്കെതിരെ കടുത്ത നടപടി സ്വീകരിക്കുമെന്ന് ജനറൽ ട്രാൻസ്പോർട്ട് അതോറിറ്റി. പുതുതായി പ്രാബല്യത്തിൽ വന്ന ലാൻഡ് ട്രാൻസ്പോർട്ട് സിസ്റ്റത്തിന്റെ വ്യവസ്ഥകൾ ലംഘിക്കുന്നവർക്കും കടുത്ത ശിക്ഷനൽകുമെന്ന് അധികൃതർ മുന്നറിയിപ്പ് നൽകി.

ലംഘകരിൽ നിന്ന് 10,000 മുതൽ 5 ദശലക്ഷം റിയാൽ വരെ പിഴ ഈടാക്കും. കൂടാതെ, രണ്ടാഴ്ച മുതൽ പരമാവധി രണ്ട് മാസം വരെ ട്രക്ക് ജപ്തി ചെയ്യുന്നതാണ് നടപടിക്രമം. നിയമലംഘനം ആവർത്തിച്ചാൽ ട്രക്ക് കണ്ടുകെട്ടുകയും സഊദി ഇതര വാഹനങ്ങളെ നാടുകടത്തുകയും ചെയ്യും.

രാജ്യത്തിലെ നഗരങ്ങൾക്കുള്ളിലോ അവക്കിടയിലോ ഉള്ള ഗതാഗതത്തിനായി വിദേശ ട്രക്കുകളുമായി കരാറിൽ ഏർപ്പെടാൻ പാടില്ലെന്നും, അതോറിറ്റിയുടെ ലൈസൻസുള്ള പ്രാദേശിക വാഹനങ്ങളിൽ മാത്രമായി ഇത് പരിമിതപ്പെടുത്തണമെന്നും അതോറിറ്റി നിർദേശിച്ചിട്ടുണ്ട്.

വിദേശ ട്രക്കുകളുടെ പ്രവർത്തനം രാജ്യത്തിന് പുറത്തുനിന്ന് വരുന്ന ചരക്കുകൾ നിശ്ചിത നഗരത്തിലേക്ക് എത്തിക്കുന്നതിനോ, അതേ ആഗമന നഗരത്തിൽ നിന്നോ മടക്കയാത്രയിൽ സ്‌ഥിതി ചെയ്യുന്ന നഗരങ്ങളിൽ നിന്നോ അവരുടെ സ്വന്തം രാജ്യത്തേക്ക് സാധനങ്ങൾ കൊണ്ടുപോകുന്നതിനോ മാത്രമായി പരിമിതപ്പെടുത്തിയിട്ടുണ്ട്. എല്ലാ വിദേശ ട്രക്കുകളും വാഹനങ്ങളും നിഷ്‌കർഷിത ചട്ടങ്ങളും നിയമങ്ങളും പാലിക്കണമെന്നും ആവശ്യമായ ലൈസൻസുകൾ നേടണമെന്നും അതോറിറ്റി നിർദേശിച്ചു.

റോഡുകളിലെ കര ഗതാഗത പ്രവർത്തനങ്ങൾ, വാഹനങ്ങൾ, സൗകര്യങ്ങൾ എന്നിവ നിയന്ത്രിക്കുകയും സേവനങ്ങൾ മെച്ചപ്പെടുത്തുകയും നിക്ഷേപം പ്രോത്സാഹിപ്പിക്കുകയും ചെയ്യുക എന്നതാണ് ലാൻഡ് ട്രാൻസ്പോർട്ട് സിസ്‌റ്റത്തിന്റെ ലക്ഷ്യം. കൂടാതെ, ചട്ടങ്ങളിലെയോ ലൈസൻസുകളിലെയോ ഏതെങ്കിലും വ്യവസ്ഥകൾ ലംഘിക്കുന്നവർക്കെതിരെ കർശനമായി പിഴ ചുമത്തും.

ആവശ്യമായ തിരുത്തൽ കാലയളവുള്ള മുന്നറിയിപ്പ്. പരമാവധി 5 ദശലക്ഷം റിയാൽ പിഴയോ ഒരു വർഷത്തിൽ കവിയാത്ത കാലയളവിൽ ലൈസൻസ് ഭാഗികമായോ പൂർണ്ണമായോ സസ്പെൻഡ് ചെയ്യുകയോ ചെയ്യും. അതുപോലെ, ലൈസൻസ് റദ്ദാക്കുന്നതിനോ, ഡ്രൈവറെയോ വാഹനത്തെയോ രണ്ടും ഒരു വർഷക്കാലം റോഡുകളിൽ പ്രവർത്തിക്കുന്നതിൽ നിന്ന് വിലക്കുന്നതിനോ, 60 ദിവസം വരെ വാഹനം കണ്ടുകെട്ടുന്നതിനോ ആവശ്യമായ നടപടികൾ സ്വീകരിക്കാനാകും.

ലൈസൻസ് നേടുന്നതിന് മുമ്പ് റോഡുകളിൽ കര ഗതാഗത പ്രവർത്തനങ്ങൾ നടത്തുന്നത് കർശനമായി നിരോധിച്ചിരിക്കുന്നു. കൂടാതെ, ലൈസൻസില്ലാതെ ഗതാഗത പ്രവർത്തനങ്ങൾക്കായി തയ്യാറെടുപ്പ് നടത്തുന്നതിനും വിലക്കുണ്ട്. ഇതിൽ, യാത്രക്കാരെ ക്ഷണിക്കൽ, പിന്തുടരൽ, തടയൽ, ഒത്തുകൂടൽ, അല്ലെങ്കിൽ യാത്രക്കാരുള്ള സ്ഥലങ്ങളിൽ വാഹനങ്ങളോടെ ചുറ്റിനടക്കൽ എന്നിവ ഉൾപ്പെടുന്നു.

Saudi Arabia has intensified penalties for foreign trucks violating regulations, including fines of up to 5 million riyals, license cancellation, and other strict measures to ensure compliance.