റമദാൻ ആയതോടെ പൈനാപ്പിളിന് ഇരട്ടി മധുരം. റമദാനോടപ്പം ചൂടും കൂടിയതോടെ പൈനാപ്പിൾ വിപണിക്കും ചൂട് കൂടി. 250 ടണ്ണിലധികമാണ് നിലവിൽ ഒരു ദിവസത്തെ പൈനാപ്പിൾ വിൽപ്പന, നേരത്തെ ഇത് 150 ടൺ ആയിരുന്നു. 

മർച്ചന്റ് അസോസിയേഷന്റെ കണക്കുകൾ പ്രകാരം 49 രൂപയായിരുന്നു പൈനാപ്പിളിന്റെ ഇന്നലത്തെ വില. ചില്ലറ വിപണിയിലെ പഴത്തിന്റെ ഗുണവും തരവും നോക്കി വില 60 ഉം 80 പോകുന്നു. ഒരാഴ്ച കൊണ്ട് കിലോക്ക് 10 രൂപയാണ് കൂടിയത്. ആദ്യമായാണ് മാർച്ച് മാസത്തിൽ വില 50 രൂപയിൽ കൂടുന്നത്. വരും ദിവസങ്ങളിൽ വില ഇനിയും ഉയരുമെന്നാണ് കർഷകർ പ്രതീക്ഷിക്കുന്നത്. 

സംസ്ഥാനത്ത് ഏകദേശം 60 ശതമാനം പൈനാപ്പിളും എറണാകുളം ജില്ലയിലാണ് ഉത്പാദിപ്പിക്കുന്നത്. കേരളത്തിൽ നിന്ന് പൈനാപ്പിൾ ഉത്തരേന്ത്യയിലേക്കും നിലവിൽ കയറ്റി അയക്കുന്നുണ്ട്. വിളവെടുപ്പ് നേരത്തെയാക്കിയതാണ് വിപണിക്ക് അനുകൂലമായതെന്ന് കർഷകർ പറഞ്ഞു.