മലപ്പുറം: സ്വകാര്യ ബസ് ജീവനക്കാരുടെ മര്‍ദനമേറ്റ ഓട്ടോ ഡ്രൈവര്‍ക്ക് ദാരുണാന്ത്യം. മലപ്പുറം മാണൂര്‍ സ്വദേശി അബ്ദുല്‍ ലത്തീഫ് ആണ് ആശുപത്രിയില്‍ വെച്ച് മരിച്ചത്. 
തിരൂര്‍-മഞ്ചേരി റൂട്ടില്‍ ഓടുന്ന സ്വകാര്യ ബസ് ജീവനക്കാരാണ് അബ്ദുല്‍ ലത്തീഫിനെ മര്‍ദിച്ചത്. വടക്കേമണ്ണയിലെ ബസ്റ്റോപ്പില്‍ നിന്ന് ഓട്ടോയില്‍ യാത്രക്കാരെ കയറ്റിയതാണ് ബസ് ജീവനക്കാരെ പ്രകോപിപ്പിച്ചത്. സംഭവത്തില്‍ ബസ് ജീവനക്കാരായ മൂന്നു പേരെ പൊലിസ് കസ്റ്റഡിയില്‍ എടുത്തു.

വെള്ളിയാഴ്ച രാവിലെയാണ് അബ്ദുല്‍ ലത്തീഫിന് മര്‍ദ്ദനമേറ്റത്. അബ്ദുല്‍ ലത്തീഫിന്റെ ഓട്ടോയില്‍ യാത്രക്കാര്‍ കയറുകയും തൊട്ടു പിന്നാലെ വന്ന സ്വകാര്യ ബസ്സിലെ ജീവനക്കാര്‍ ഓട്ടോതടഞ്ഞുനിര്‍ത്തി ഇത് ചോദ്യം ചെയ്യുകയും തുടര്‍ന്ന് വാക്കേറ്റം ഉണ്ടാവുകയുമായിരുന്നു. തുടര്‍ന്നാണ് ബസ് ജീവനക്കാര്‍ ലത്തീഫിനെ മര്‍ദിച്ചത്.

പരുക്കേറ്റ അബ്ദുല്‍ ലത്തീഫ് ഓട്ടോ ഓടിച്ച് മലപ്പുറം താലൂക്ക് ആശുപത്രിയില്‍ എത്തുകയായിരുന്നു. അവിടെവച്ചാണ് ലത്തീഫ് കുഴഞ്ഞുവീണു മരിച്ചത്. മൃതദേഹം പോസ്റ്റ്‌മോര്‍ട്ടം നടപടികള്‍ക്കായി മഞ്ചേരി മെഡിക്കല്‍ കോളജിലേക്ക് മാറ്റി.