വിമാന ടിക്കറ്റ് എടുക്കുന്നവരിൽ 44 ശതമാനം ആളുകളും അധിക നിരക്ക് നൽകുന്നതായി സർവേ റിപ്പോർട്ട്. ഇഷ്ടപ്പെട്ട സീറ്റ് ലഭിക്കാനും കുടുംബമൊത്തുള്ള യാത്രയിൽ ഒന്നിച്ചിരിക്കാനുമാണ് ഇത്തരത്തിൽ അധിക പണം ചെലവിടുന്നത്. സീറ്റ് അലോക്കേഷൻ ഫീസായി 200 മുതൽ 2,000 രൂപ വരെയാണ് ഓരോ ആളുകളും ചിലവിടുന്നതെന്ന് സർവേ പറയുന്നു. ഇത് വിമാന നിരക്കിൻ്റെ 5-40 ശതമാനം വരും. ലോക്കൽ സർക്കിൾ  നടത്തിയ സർവേയിലാണ് ഇക്കാര്യങ്ങൾ വ്യക്തമാക്കുന്നത്. 

രാജ്യത്തെ 339 ജില്ലകളിലെ ഉപഭോക്താക്കളിൽ നിന്ന് 41,000-ലധികം പ്രതികരണങ്ങൾ ലഭിച്ച പുതിയ സർവേ, കുടുംബാംഗങ്ങൾക്കൊപ്പം, പ്രത്യേകിച്ച് കൊച്ചുകുട്ടികളുമൊത്തുള്ള യാത്രയ്ക്കായി ബുക്ക് ചെയ്യുമ്പോഴുള്ള ഫ്ലയർമാരുടെ പ്രശ്‌നങ്ങളിൽ ശ്രദ്ധ കേന്ദ്രീകരിച്ചതായി ലോക്കൽ സർക്കിൾ പറഞ്ഞു. സർവേ അനുസരിച്ച്, കുടുംബം ഒന്നിച്ച് ഇരിക്കാൻ ആഗ്രഹിക്കുന്നുവെങ്കിൽ, യഥാർത്ഥ ടിക്കറ്റ് വിലയേക്കാൾ കൂടുതൽ അവർ ചിലവഴിക്കുന്നു. കാരണം മിക്ക സീറ്റുകളും 200-2000 രൂപ അധിക പേയ്‌മെൻ്റിൽ പല എയർലൈനുകളിലും ലഭ്യമാണ്.

ഈ പണം അധികമടച്ച് സീറ്റ് ബുക്ക് ചെയ്യാത്തപക്ഷം കുടുംബാംഗങ്ങൾ പ്രത്യേക നിരകളിൽ ഇരിക്കേണ്ടി വരും. ഇത് കുട്ടികളുമായി പോകുന്ന യാത്രക്കാർക്ക് ഏറെ ബുദ്ധിമുട്ട് സൃഷ്ടിക്കും. എന്നാൽ, ചില എയർലൈനുകളിൽ മധ്യ സീറ്റിന് മാത്രം അധിക പണമടയ്ക്കേണ്ടതില്ല
.
സർവേ കണക്കുകൾ പ്രകാരം, ചില എയർലൈനുകൾക്ക് ഏകദേശം 80 ശതമാനം സീറ്റുകൾക്ക് ഇപ്പോൾ സീറ്റ് അലോക്കേഷൻ ഫീസ് നൽകേണ്ടതുണ്ട്. കഴിഞ്ഞ 12 മാസത്തിനിടെ വിമാനം ബുക്ക് ചെയ്ത 65 ശതമാനം യാത്രക്കാരും ഒന്നോ അതിലധികമോ സീറ്റ് റിസർവ് ചെയ്യുന്നതിന് അധിക ഫീസ് നൽകിയതായി സർവേ കൂട്ടിച്ചേർത്തു.

കഴിഞ്ഞ വർഷം അവസാനം ഉപഭോക്തൃ കാര്യ മന്ത്രാലയവും ഉപഭോക്തൃ റെഗുലേറ്റർ സിസിപിഎയും ഈ വിഷയത്തിൽ എയർലൈനുകളുടെ യോഗം വിളിക്കുകയും അന്യായമായ വ്യാപാര സമ്പ്രദായങ്ങളെക്കുറിച്ചും "സൗജന്യ" വെബ് ചെക്ക്-ഇന്നിൻ്റെ തെറ്റിദ്ധരിപ്പിക്കുന്ന അവകാശവാദങ്ങളെക്കുറിച്ചും അവരെ ചോദ്യം ചെയ്യുകയും ചെയ്തിരുന്നെങ്കിലും ഇപ്പോഴും ഈ സ്ഥിതിയിൽ വലിയ മാറ്റം വന്നിട്ടില്ല.