വാഷിങ്ടണ്‍; 41ഓളം രാജ്യങ്ങളിലെ പൗരന്‍മാര്‍ക്ക് യാത്രാ നിയന്ത്രണങ്ങള്‍ ഏര്‍പ്പെടുത്താനുള്ള നടപടികളുമായി ട്രംപ് ഭരണകൂടം. മൂന്നു വിഭാഗങ്ങളായി രാജ്യങ്ങളെ തിരിച്ച് അവിടുത്തെ പൗരന്‍മാര്‍ക്ക് വിസാ വിലക്കുകള്‍ ഏര്‍പ്പെടുത്താനാണ് നീക്കം. ഇന്ത്യയുടെ അയല്‍രാജ്യങ്ങളായ പാകിസ്താന്‍, ഭൂട്ടാന്‍, മ്യാന്‍മര്‍ എന്നീ രാജ്യങ്ങളിലുള്ളവര്‍ക്ക് നിയന്ത്രണങ്ങള്‍ വരും.

പത്തുരാജ്യങ്ങളിലെ ആദ്യ പട്ടികയില്‍ അഫ്ഗാനിസ്താന്‍, ഇറാന്‍, സിറിയ, ക്യൂബ, വടക്കന്‍ കൊറിയ എന്നീ രാജ്യങ്ങളുമുണ്ട്. ഇവിടെനിന്നുളളവരുടെ വിസ പൂര്‍ണമായി തന്നെ റദ്ദാക്കും. എരിത്രിയ, ഹെയ്തി, ലാവോസ്, മ്യാന്‍മര്‍, ദക്ഷിണ സുഡാന്‍ എന്നിവയാണ് രണ്ടാംപട്ടികയിലുളളത്. ഇവര്‍ക്ക് ഭാഗികനിയന്ത്രണമാവും വിസ അനുവദിക്കുന്നതില്‍ ഉണ്ടാവുക. ടൂറിസ്റ്റ്, സുറ്റുഡന്റ്, കിടയേറ്റ വിസകള്‍ക്കാണ് നിയന്ത്രണമേര്‍പ്പെടുത്തുക. 

26 രാജ്യമടങ്ങിയതാണ് മൂന്നാമത്തെ വിഭാഗം. പാകിസ്താനും ഭൂട്ടാനുമൊക്കെ ഈ പട്ടികയില്‍ വരും. 60 ദിവസത്തിനുള്ളില്‍ പോരായ്മകള്‍ പരിഹരിക്കാന്‍ സര്‍ക്കാര്‍ തയ്യാറായില്ലെങ്കില്‍ ഈ രാജ്യങ്ങളിലെ പൗരന്‍മാരുടെ വിസ ഭാഗികമായി റദ്ദാക്കും. വാര്‍ത്ത ഏജന്‍സിയായ റോയിട്ടേഴ്‌സ് ആണ് ട്രംപ് ഭരണകൂടത്തിലെ ഉദ്യോഗസ്ഥരെ ഉദ്ധരിച്ച് ഇക്കാര്യങ്ങള്‍ റിപോര്‍ട്ട് ചെയ്തിരിക്കുന്നത്. പട്ടികയില്‍ ഇനിയും മാറ്റങ്ങളുണ്ടാവാമെന്നും നിലവിലെ നിര്‍ദേശത്തിന് സര്‍ക്കാരിന്റെ അനുമതി ലഭിച്ചിട്ടില്ലെന്നും പറയപ്പെടുന്നു.