അബൂദബി: 2025 തുടങ്ങി മൂന്നു മാസത്തിനുള്ളില്‍ 18 വ്യാജ ഫാര്‍മസ്യൂട്ടിക്കല്‍ ഉല്‍പ്പന്നങ്ങള്‍ കണ്ടെത്തിയതായി അബൂദബി ആരോഗ്യ വകുപ്പ് അറിയിച്ചു.

വ്യാജ മരുന്നുകള്‍, ഭക്ഷണ സപ്ലിമെന്റുകള്‍, സൗന്ദര്യവര്‍ദ്ധക ഉല്‍പ്പന്നങ്ങള്‍ എന്നിവയുടെ പുതുക്കിയ പട്ടിക പുറത്തിറക്കിയതായി ആരോഗ്യവകുപ്പ് പ്രസ്താവനയില്‍ വെളിപ്പെടുത്തി. അടുത്തിടെ പട്ടികയിലെക്ക് കൂട്ടിചേര്‍ത്ത ഉല്പ്പന്നങ്ങളോടെ വകുപ്പിന്റെ മുന്നറിയിപ്പ് പട്ടികയിലുള്ള വ്യാജ ഫാര്‍മസ്യൂട്ടിക്കല്‍ ഉല്‍പ്പന്നങ്ങളുടെ ആകെ എണ്ണം 3,142 ആയി.

ഈ ഉല്‍പ്പന്നങ്ങളില്‍ ഭൂരിഭാഗവും പ്രകൃതിദത്ത സ്രോതസ്സുകളില്‍ നിന്ന് നിര്‍മ്മിച്ച് വിപണനം ചെയ്യപ്പെടുന്നവയാണ്. കൂടാതെ നിയമവിരുദ്ധമായി ഓണ്‍ലൈന്‍ പ്ലാറ്റ്‌ഫോമുകള്‍ വഴിയാണ് പലപ്പോഴും ഇവ വില്‍ക്കുന്നത്.  

ഈ വ്യാജ മരുന്നുകള്‍ ബോഡി ബില്‍ഡിംഗ് സപ്ലിമെന്റുകള്‍, സൗന്ദര്യ ചികിത്സകള്‍ എന്നിവയുള്‍പ്പെടെയുള്ള ഭക്ഷണ, സൗന്ദര്യവര്‍ദ്ധക, ഭാരം കുറയ്ക്കല്‍ ഉല്‍പ്പന്നങ്ങള്‍ ഉപയോഗിക്കുന്നതിന്റെ അപകടങ്ങളെ എടുത്തുകാണിക്കുന്നു. ഈ ഉല്പ്പന്നങ്ങള്‍ കാര്യമായ ആരോഗ്യ പ്രശ്‌നങ്ങള്‍ സൃഷ്ടിക്കാനിടയുള്ളതിനാലാണ് എമിറേറ്റ് ഇവയെ മുന്നറിയിപ്പ് പട്ടികയില്‍ ഉള്‍പ്പെടുത്തിയിരിക്കുന്നത്.

വകുപ്പ് പറയുന്നതനുസരിച്ച്, വ്യാജ ഉല്‍പ്പന്നങ്ങള്‍ ഇങ്ങനെ തരംതിരിച്ചിരിക്കുന്നു:

• 269 ബോഡിബില്‍ഡിംഗിനായി ഉപയോഗിക്കുന്ന പേശി വര്‍ദ്ധിപ്പിക്കുന്ന സപ്ലിമെന്റുകള്‍
• 341 സൗന്ദര്യവര്‍ദ്ധക ഉല്‍പ്പന്നങ്ങള്‍
• 582 ഭാരം കുറയ്ക്കല്‍, സ്ലിമ്മിംഗ് ഉല്‍പ്പന്നങ്ങള്‍
• 1,503 ലൈംഗിക ഉത്തേജന ഉല്‍പ്പന്നങ്ങള്‍
• 447 മറ്റ് വ്യാജ ഇനങ്ങള്‍

നിരോധിച്ച ഈ വ്യാജ ഉല്‍പ്പന്നങ്ങളുടെ പേരുകള്‍, ചിത്രങ്ങള്‍, ഉറവിടങ്ങള്‍, കാരണങ്ങള്‍ എന്നിവ വകുപ്പ് പ്രസിദ്ധീകരിച്ചിട്ടുണ്ട്.

ഫോഴ്‌സ്, ബ്ലാക്ക് ഹോഴ്‌സ്, റോയല്‍ ഹണി, ഹണി എക്‌സ്ട്രാ സ്‌ട്രെങ്ത്, സ്റ്റിഫ് റോക്ക് ഗോള്‍ഡ്, റാഗിംഗ് ബുള്‍ 50000, സൂപ്പര്‍ റിനോ ഗോള്‍ഡ്, റിനോ 25 ഹണി, ഫ്‌ലവര്‍ പവര്‍, ക്വാഡ്രാഗണ്‍ ടെസ്റ്റോളോണ്‍, സ്റ്റെനബോളിക്, പിങ്ക്‌സ് ഫാഷന്‍ ഫെയര്‍ ക്രീം, ഹാഡോ ലാബോ ഗോക്യുജുന്‍ ഹതോമുഗി, നിയോപ്രോസോണ്‍ ക്രീം തുടങ്ങിയ വ്യാജ മരുന്നുകളും പട്ടികയില്‍ ഉള്‍പ്പെടുന്നു.

ഈ ഉല്‍പ്പന്നങ്ങള്‍ ഗുരുതരമായ ആരോഗ്യ പ്രശ്‌നങ്ങള്‍ക്ക് കാരണമാകുമെന്ന് അബൂദബി ആരോഗ്യ വകുപ്പ് മുന്നറിയിപ്പ് നല്‍കിയിട്ടുണ്ട്. ഹൃദയാഘാതം, പക്ഷാഘാതം, കരള്‍ തകരാറ്, ചര്‍മ്മത്തിലെ ചൊറിച്ചില്‍, ഉയര്‍ന്ന രക്തസമ്മര്‍ദ്ദം, കേള്‍വി അല്ലെങ്കില്‍ കാഴ്ച നഷ്ടപ്പെടല്‍ എന്നിവ പാര്‍ശ്വഫലങ്ങളില്‍ ഉള്‍പ്പെടും.

പേശികളുടെ വളര്‍ച്ച, ലൈംഗികശേഷി വര്‍ദ്ധിപ്പിക്കല്‍, ശരീരഭാരം കുറയ്ക്കല്‍, സൗന്ദര്യം എന്നിവയ്ക്കായി സാധാരണയായി വിപണനം ചെയ്യപ്പെടുന്ന മായം ചേര്‍ത്തതോ മലിനമായതോ ആയ പദാര്‍ത്ഥങ്ങള്‍ പട്ടികയില്‍ ഉള്‍പ്പെടുന്നു. വെബ്‌സൈറ്റില്‍ ലിസ്റ്റ് ചെയ്തിരിക്കുന്ന ഏതെങ്കിലും ഉല്‍പ്പന്നങ്ങള്‍ വാങ്ങുന്നതില്‍ നിന്നോ കഴിക്കുന്നതില്‍ നിന്നോ വിട്ടുനില്‍ക്കണമെന്നും ഏതെങ്കിലും ഭക്ഷണപദാര്‍ത്ഥങ്ങള്‍ ഉപയോഗിക്കുന്നതിന് മുമ്പ് ആരോഗ്യ സംരക്ഷണ വിദഗ്ധരില്‍ നിന്ന് എല്ലായ്‌പ്പോഴും വൈദ്യോപദേശം തേടണമെന്നും വകുപ്പ് പൊതുജനങ്ങളോട് അഭ്യര്‍ത്ഥിച്ചു.

Abu Dhabi Issues Warning on 18 Fake Pharmaceutical Products