റിയാദ്: മക്കയിലെ മസ്ജിദുല്‍ ഹറമിന്റെ ഫോട്ടോ എടുക്കാന്‍ ഔദ്യോഗികമായി ലൈസന്‍സ് നേടിയ ആദ്യ സഊദി വനിത എന്ന നേട്ടം നദാ അബ്ദുല്ല അല്‍ഗാംദിക്കു സ്വന്തം. നാദയുടെ വിപ്ലവകരമായ നേട്ടം വിവിധ മേഖലകളില്‍ സഊദി സ്ത്രീകള്‍ തുടര്‍ച്ചയായി കൈവരിച്ച മുന്നേറ്റത്തിന്റെ തുടര്‍ച്ചയായാണ് കണക്കാക്കപ്പെടുന്നത്.

'സഊദി സ്ത്രീകള്‍ എല്ലാ മേഖലകളിലും തങ്ങളുടെ നേതൃത്വം തെളിയിക്കുന്നു' എന്ന തലക്കെട്ടോടെ അറബിക് വാര്‍ത്താ ചാനലായ അല്‍ എഖ്ബാരിയ സമൂഹ മാധ്യമമായ എക്‌സില്‍ ഒരു വീഡിയോ പങ്കിട്ടു. ഇതോടെ മക്കയിലെ മസ്ജിദുല്‍ ഹറമിനുള്ളില്‍ പ്രവര്‍ത്തിക്കാന്‍ ലൈസന്‍സുള്ള ആദ്യ വനിതാ ഫോട്ടോഗ്രാഫറായി നദാ അല്‍ ഗാംദി മാറി.

المرأة السعودية تثبت ريادتها في كل المجالات..

ندى الغامدي.. أول مصورة فوتوغرافية تحصل على رخصة داخل #المسجد_الحرام

عبر مراسلة #الإخبارية ولاء المطرفي pic.twitter.com/iwbwaGYe3u

— قناة الإخبارية (@alekhbariyatv) March 8, 2025

സമൂഹ മാധ്യമമായ ഇന്‍സ്റ്റഗ്രാമില്‍ പങ്കിട്ട ഒരു വീഡിയോയില്‍ ചെറുപ്പം മുതല്‍ താന്‍ മസ്ജിദുല്‍ ഹറമിലെ ചിത്രങ്ങള്‍ പകര്‍ത്തുന്നത് താന്‍ സ്വപ്‌നം കണ്ടിരുന്നതായി നദാ അല്‍ ഗാംദി വെളിപ്പെടുത്തി. പുണ്യമാക്കപ്പെട്ട മസ്ജിദിനുള്ളില്‍ ഫോട്ടോഗ്രാഫിക്ക് കര്‍ശനമായ നിയന്ത്രണങ്ങള്‍ ഉള്‍പ്പെടെയുള്ള കാര്യമായ വെല്ലുവിളികള്‍ ഉണ്ടായിരുന്നിട്ടും തന്റെ സ്വപ്‌നം സാക്ഷാത്കരിക്കാനുള്ള തന്റെ യാത്ര തുടരാന്‍ നദക്കായി. 

മസ്ജിദുല്‍ ഹറമിലെ മീഡിയ സെന്റര്‍ ടീമിലെ ഒരു പ്രധാന അംഗമെന്ന നിലയില്‍ ഇവിടെത്തെ ആത്മീയ സത്ത രേഖപ്പെടുത്തുന്നതില്‍ അവര്‍ നിര്‍ണായക പങ്ക് വഹിക്കുന്നു. തീര്‍ത്ഥാടകരുടെ ആശ്വാസകരമായ നിമിഷങ്ങളും പള്ളിയുടെ വാസ്തുവിദ്യാ മഹത്വവും പകര്‍ത്തി കാഴ്ചയില്‍ അതിശയകരവും കലാപരവുമായ രീതിയില്‍ അവരിത് ലോകത്തിന് മുന്നില്‍ അവതരിപ്പിക്കുന്നു.

'ദൈവത്തിന് നന്ദി, എന്റെ ലക്ഷ്യങ്ങളിലും സ്വപ്നങ്ങളിലും ഒന്ന് സാക്ഷാത്കരിക്കപ്പെട്ടു, രണ്ട് വിശുദ്ധ പള്ളികളുടെ പ്രസിഡന്‍സിയില്‍, സ്റ്റേറ്റ് സെക്യൂരിറ്റിയുടെ നേതൃത്വത്തിലുള്ള സെക്യൂരിറ്റി ഏവിയേഷനുമായി സഹകരിച്ച്, മസ്ജിദുല്‍ ഹറമിന്റെ ആകാശത്തേക്ക് ആകാശ ഫോട്ടോഗ്രാഫിക്കായി പറന്ന ആദ്യത്തെ വനിതാ ജീവനക്കാരിയും ഫോട്ടോഗ്രാഫറുമായി ഞാന്‍ മാറി,' അവര്‍ ഇന്‍സ്റ്റാഗ്രാമില്‍ പങ്കുവെച്ചു.

പതിറ്റാണ്ടുകളായി കുറഞ്ഞ സ്ത്രീ തൊഴില്‍ പങ്കാളിത്ത നിരക്കു രേഖപ്പെടുത്തിയിരുന്ന സഊദി അടുത്ത കാലത്തായി ഈ കണക്കുകളില്‍ വളരെയധികം മുന്നോട്ടു കുതിച്ചിട്ടുണ്ട്. സഊദി കിരീടാവകാശി മുഹമ്മദ് ബിന്‍ സല്‍മാന്റെ വിഷന്‍ 2030 പ്രകാരം, സ്ത്രീകളെ ശാക്തീകരിക്കുന്നതിനും സമ്പദ്‌വ്യവസ്ഥയെ വൈവിധ്യവല്‍ക്കരിക്കുന്നതിനുമായി രാജ്യം വിപുലമായ പരിഷ്‌കാരങ്ങള്‍ അവതരിപ്പിച്ചിരുന്നു.

Nada Al-Ghamdi becomes first Saudi woman licensed to photograph the Grand Mosque