അഹമ്മദാബാദ്: ഐപിഎല്ലിൽ പഞ്ചാബ് കിങ്സിന് ആദ്യ ജയം. ഗുജറാത്ത് ടൈറ്റൻസിനെ 11 റൺസിനാണ് പഞ്ചാബ് പരാജയപ്പെടുത്തിയത്. ഗുജറാത്തിന്റെ തട്ടകമായ അഹമ്മദാബാദ് നരേന്ദ്ര മോദി സ്റ്റേഡിയത്തിൽ നടക്കുന്ന മത്സരത്തിൽ ആദ്യം ബാറ്റ് ചെയ്ത പഞ്ചാബ് 20 ഓവറിൽ അഞ്ചു വിക്കറ്റ് നഷ്ടത്തിൽ 243 റൺസിന്റെ കൂറ്റൻ ടോട്ടലാണ് നേടിയത്. വിജയലക്ഷ്യം പിന്തുടർന്നിറങ്ങിയ ഗുജറാത്ത് ഇന്നിങ്സ് 20 ഓവറിൽ അഞ്ചു വിക്കറ്റ് നഷ്ടത്തിൽ 232 റൺസിൽ അവസാനിക്കുകയായിരുന്നു.

ഗുജറാത്തിനായി സായ് സുദർശൻ, ജോസ് ബട്ലർ എന്നിവർ അർദ്ധ സെഞ്ച്വറി നേടി മികച്ച പ്രകടനം നടത്തിയെങ്കിലും ടീമിനെ വിജയത്തിൽ എത്തിക്കാൻ സാധിക്കാതെ പോവുകയായിരുന്നു. അഞ്ച് ഫോറുകളും ആറ് സിക്‌സുകളും ഉൾപ്പടെ 41 പന്തിൽ 74 റൺസാണ് സുദർശൻ നേടിയത്. ബട്ലർ 33 പന്തിൽ 54 റൺസും നേടി. നാല് ഫോറുകളും ഒരു സിക്സുമാണ്‌ ഇംഗ്ലണ്ട് താരം നേടിയത്. ഷെർഫാനെ റൂഥർഫോർഡ് 28 പന്തിൽ 46 റൺസും ക്യാപ്റ്റൻ ശുഭ്മൻ ഗിൽ 14 പന്തിൽ 33 റൺസും നേടി.

നേരത്തെ ക്യാപ്റ്റൻ ശ്രേയസ് അയ്യരിന്റെ വെടിക്കെട്ട് ബാറ്റിങ്ങിന്റെ കരുത്തിലാണ് പഞ്ചാബ് കൂറ്റൻ ടോട്ടൽ അടിച്ചെടുത്തത്. അർദ്ധ സെഞ്ച്വറി നേടിയാണ് അയ്യർ തിളങ്ങിയത്. 42 പന്തിൽ പുറത്താവാതെ 97 റൺസാണ് പഞ്ചാബ് നായകൻ നേടിയത്. 230.95 പ്രഹര ശേഷിയിൽ ഒമ്പത് കൂറ്റൻ സിക്സുകളും അഞ്ചു ഫോറുകളുമാണ് താരം നേടിയത്.

ശശാങ്ക് സിങ് 16 പന്തിൽ പുറത്താവാതെ 44 റൺസാണ് ശശാങ്ക് നേടിയത്. ആറ് ഫോറുകളും രണ്ട് സിക്സുമാണ് താരം നേടിയത്.  പ്രിയാൻശ് ആര്യ 23 പന്തിൽ 47 റൺസും നേടി മികച്ച പ്രകടനം നടത്തി. ഏഴ് ഫോറുകളും രണ്ട് സിക്‌സും അടങ്ങുന്നതാണ് താരത്തിന്റെ ഇന്നിങ്സ്.  

ഏപ്രിൽ ഒന്നിന് ലഖ്‌നൗ സൂപ്പർ ജയന്റ്സിനെതിരെയാണ് പഞ്ചാബിന്റെ അടുത്ത മത്സരം. മാർച്ച് 29ന് നടക്കുന്ന മത്സരത്തിൽ മുംബൈ ഇന്ത്യൻസിനെയാണ് ഗുജറാത്ത് നേരിടുക.

Punjab Kings beat Gujarat Titans in IPL 2025